HAMLET PRZEKLAD KLINGONSKI:P

 

Cytat:
Qo'noS ta'puq, *Hamlet* lotlut. lutvaD ghotvam luDalu'. tlhaw'DIyuS*; Qo'noS ta' ghaH Hamlet*; ben ta' puqloD; DaHjaj ta' loDnI'puqloD je ghaH polonyuS*; Qang ghaH Horey'So*; *Hamlet* jup ghaH layerteS*; *polonyuS* puqloD ghaH voltImaD* qornelyuS* roSenQatlh*; toy'wI'pu' chaH ghIlDeSten* 'oSrIq* wa' qaH wa' lalDan'utlh marSe'luS*; 'utlh chaH. bernarDo* veranchISqo*; mang ghaH reynalDo*; *polonyuS* toy'wI' ghaH vagh DawI'pu' cha' tlhaQwI'; molwI' Da vortIbraS*; *DuraS* qorDu''a' pIn be'nI'puqloD ghaH wa' HoD tera' Duypu' wa' jaw wa' mang cha' QumwI' *Horey'So* wa' toy'wI' QonoSnganpu' *Hamlet* vav lomqa' ghertlhuD*; Qo'noS ta'be', *Hamlet* SoS je ghaH 'ovelya*; *polonyuS* puqbe' ghaH jawloDpu', jawbe'pu' je, 'utlhpu' je, mangpu' je, yo'mangpu' je, toy'wI'pu' latlh je; jatlhbe' chaH lut Daq: QonoS lut 'ay' wa' lut 'ay'Hom wa' *tlhIn*. ta'qach'a' 'et 'avwI'Daq jen. ['avtaH *veranchISqo*. ghaHDaq 'el *bernarDo*] bernarDo chol 'Iv? veranchISqo Qo', jIH HIjang. yIQamchoH 'ej yIngu'egh. bernarDo taHjaj wo'! veranchISqo *bernarDo*? bernarDo jIHbej. veranchISqo bImatlhba', qarqu'mo' bIcholmeH poHlIj. bernarDo qaSpu' rampjep. QongDaq yIghoS, *veranchISqo*. veranchISqo qatlho'bej, Qu'wIjvo' choSonmo'. bIrqu'. 'ej roplaw' tIqwIj. bernarDo bI'avtaHvIS jot'a'? veranchISqo vIHbe' je ghew. bernarDo vaj maj. Qapla'. *Horey'So* quv, *marSe'luS* je Daghomchugh --- jI'avtaHvIS qochma' chaH --- vaj tImoDmoH. veranchISqo SuH, chaH vIQoylaw'. 'eH, yIQam! chol 'Iv? ['el *Horey'So*, *marSe'luS* je] Horey'So qo'vam juppu'. marSe'luS Qo'noS pIn'a' lobwI' je. veranchISqo tlhIHvaD Qapla'. marSe'luS Qapla', SuvwI' yuDHa'. DuSonta' 'Iv? veranchISqo Qu'vaD mucho' *bernarDo*. Qapla'. [mej] marSe'luS SuH! SuH! *bernarDo*! bernarDo toH, yIja': SaH'a' *Horey'So*? Horey'So SaHlaw' 'ay'Daj neH. bernarDo nuqneH, *Horey'So* QaQ. nuqneH, *marSe'luS*. Horey'So qaStaHvIS ramvam, narghqa''a' HoSDo'Hey? bernarDo paghna' vIleghpu'. marSe'luS "Sunaj neH" ja' *Horey'So*. ghaH jon qechvetlh 'e' botqu' je ghaH, qa'Hey Dojqu''e' cha'logh wIleghpu'bogh Harbe'taHvIS. naDev vaj ramvam tupmey bejlI'meH, vItlhejmoHpu'. vaj cholqa'chugh HoSDo'Hey, mInDu'maj 'ollaH ghaH, 'ej qa'vaD jatlhlaH. Horey'So wejpuH. narghbe'ba' bIH. bernarDo toH, loQ yIba'. 'elbe'meH lutmaj, teS Surchem DarIHlaw'. vaj bIH DIHIvqa'meH, wanI' wIleghbogh, qaStaHvIS cha' ramjep, wIja'. Horey'So maba'. 'ej maHvaD ghu'vam ja'chu'jaj *bernarDo*. bernarDo qaStaHvIS wa'Hu' ram, lengDI' QuvHov poS yuQvetlh, 'ej, DaH SepDaq wovmoHbogh, bochmeH ghoSpu'DI' lengwI'; naDev ma'avtaHvIS *marSe'luS* jIH je, ghumDI' rep wa' --- ['el lomqa'] marSe'luS bIjatlh 'e' mev! peqIm! DaH cholqa' bIH! bernarDo Heghpu'bogh ta'ma' rapmeH chenta' bIH. Horey'So HaDwI' SoH. bIHvaD vay' yIjatlh, *Horey'So*. bernarDo ta' rurqu' bIH, qar'a'? yIqIm, *Horey'So*. Horey'So rurqu'bej bIH. mumerqu' 'ej mubItmoH. bernarDo bIHvaD jatlh vay' DaH neHlaw'. marSe'luS 'eH, *Horey'So*. bIHvaD yIjatlh. Horey'So ram repvam, porghvetlh vIDqu' 'IH'e' je, ben yItmeH lo'bogh Qo'noS ta' webHa' wInolpu'bogh, boDoQta', HattaHvIS. vaj nuq tlhIH jay'? ghuy'cha' Sara': pejatlh! marSe'luS bIH mawlu'law'. bernarDo SuH! Haw'meH moDchoH bIH. Horey'So peloS! pejatlh! pejatlh! Sara': pejatlh! [mej lomqa'] marSe'luS DaH Haw'ta', 'ej jangQo'. bernarDo nuqneH, *Horey'So*? DaH bIchIS. bIQomlaw'. wa'Hu' manaj neH DaH 'e' DaHar'a'? toH, vuDlIj nuq? Horey'So vI'Iprup jay': wanI'vam vIHarQo', 'olbe'chugh tu'chu'bogh 'ej vItbogh mInwIj. marSe'luS ta'ma' lurur, qar'a'? Horey'So bIrur'egh je! *DuraS* pIn tlhIvqu' Hay'taHvIS je ghaH, yoDSutvetlh'e' tuQ. qejmeH qabvetlh 'ang ghaH, chuchDaq yoDDuj *qInSaya* qIpDI' je, QeHtaHvIS ja'chuq. Hujqu'. marSe'luS qaStaHvIS ramjepna' tup qar, DaH wejlogh vID 'ej nujuSpu' ghaH, ma'avtaHvIS. Horey'So qechwIj vIvangnISbogh vIwIvlaHbe'. 'ach nom jIwuqnISchugh jIqelchu'pa', vaj wo'vaD qaS Qugh taQ 'e' pIHmoHlaw'. marSe'luS toH, DaH peba', 'ej ja'choHjaj SovwI': qatlh wo' rewbe'pu', negh je vumnISmoH yepbogh 'ej SaHnISqu'moHbogh ram Qu'vam, qaSDI' ram Hoch? 'ej qaStaHvIS pem Hoch, qatlh, chenmeH may'morgh, baS lutetmoHlu'? qatlh, veS mIqta'mey je'meH, novvaD mechlu'? 'ej qatlh Duj chenmoHwI' lumuvmoHlu'? pavqu'mo' Qu'chaj, chaHvaD Hatlaw' len. DaH vummeH pemvaD jIjnIS je ramjep, moDmo' Doy'wI'pu'. Hochvam vangnISlu', qaSbeHmo' nuq? 'oH QIjlaH 'Iv? Horey'So SuH, jIH. toH, joS lutlhuplu'bogh vIja'laH jIH. wanI' DaSov: DaH maHvaD narghlaw'pu'bogh ben ta'ma' Hay'meH qaDta' *DuraS* pIn, *vortIbraS*, ghaH tungHa'mo' qeHbogh DujDaj. 'ej Hay'DI', *vortIbraS*vetlh tlhIvqu' HoH ta' *Hamlet* yoHqu' --- yoHqu' ghaH, 'e' noH mIchvam ngan Hoch. vaj ra'mo' may' mab'e' lu'olchu'pu'bogh chutmey, batlh lurDech je, yInDaj ghajHa'DI', SepmeyDaj Hoch'e' nIteb ben charghbogh ghaH, ghajHa'nIS je, 'ej SuqnIS may' QapwI''e'. mabchajvaD rapbogh Sep yoSmey SuDruppu' je ta'ma'. 'ej SuqmeH *vortIbraS*vaD yaHnIS bIH, chaq lujchugh ta'. vaj ra'mo' may'chaj mab, 'ej poQmo' ghItlhvetlh chut lulajpu'bogh, *Hamlet*vaD yaHnIS SepDaj'e'. toH, qaH: *vortIbraS* Qup'e' tujmoHmo' 'ej tebmo' lagh toDuj'e' wej qeqmoHchu'bogh poH, yoSvamDaq yoSvetlhDaq je, Sepchaj veHDaq, chutmey pabbe'taHbogh vIDwI' tlhoQ'e' nom boSta'. Soj, jajHuch je SuqmeH chaH, HuH Qu'vaD HuHchaj qu'moHta' QupwI'. 'ej Qu'chaj ra'bogh ghovchu' wo'maj qum: raDmo' rojmabDaj, HoSmo' je mangghomDaj, Sep'e' ghajHa'bogh vavDaj Suqqa' neHba'. 'ej qeqmeymaj meq potlh, ram Qu'maj mung je, wo'majDaq moDbogh mISHey Hal je 'oHlaw' wanI'vam'e'. bernarDo toH 'oHba'. 'a ghaytan taQbe' wanI', ma'avtaHvIS nucholDI' San HoSDo'Hey, nuH qengtaHvIS. ta' rur, 'ej ben, DaHjaj je, veS qeqvam meq ghaH ta'vetlh'e', qar'a'? Horey'So lam 'ay'Hom neH bIH. 'a yab mIn lunuQlaH. tIQtaHvIS, chepbogh romuluS wo' quvDaq poS molmey Hoch, loQ pumpa' *yulyuS* Dunqu'. 'ej chImchu'. romuluS vengHeDaq jawchoH 'ej jach lom'e' wej luqatHa'lu'bogh. lIy tlha' chal qulmey tIqqu', SISbogh 'Iw je. pemHovDaq qIj maQmIgh. 'ej Hov QIbmo' ropmo' bIQ'a'mey wuvmoHbogh maS'e', jaj Qav'e' maqlaw' 'oH. ben mIchmajvaD, wo'maj nganpu'vaD je, wanI'mey qu' nungwI'mey rap, San QeH pIHmoHtaHwI' je, wa'leS lotna' lIHwI' je 'angpu' je jIjchuqbogh chal, ngeHbej je --- 'a SuH! peqIm! DaH cholqa'! ['elqa' lomqa'] yIt 'e' vInISrup, tugh muSangchugh je. loS, Dolqoq! QIch, ghoghlaH joq vay' Daghajchugh, HIjatlh! bIjotmeH SoH, 'ej naD vISuqmeH jIH, Qu' vay' vIchav DaH 'e' DapoQqangchugh, HIjatlh! wo'maj nem Qugh DaSovchugh, vaj, SoHvo' leSSov wISuqDI', Do' wIbotlaHchugh, HIjatlh! pagh, yavmaj chorDaq mIp DanIHta'bogh DaboSta'DI' DaSo'chugh, HattaHvIS --- 'ej pIj wanI'vetlhmo' SuyItnIS, qa'pu', SuHeghpu'DI' --- vaj HeS yIja'. [jach jajlo'ghogh Qa'] yIratlh! yIja'! *marSe'luS*, yIt ghaH 'e' yImev! marSe'luS SuH, vIqIp'a'? betleHwIj vIlo''a'? Horey'So yevQo'chugh, vaj yIqIp. bernarDo naDev! Horey'So naDev! marSe'luS loj rIntaH! [mej lomqa'] nurna' SuvwI' ghaH. vaj wImawpu'bej, yolqoq wInIDmo': muD rur, rIQlaHbe'mo'. wIqIpDI' 'ej malujDI', ghaH wIvaq neH. bernarDo jatlhrup ghaH, jachDI' Qa'. Horey'So 'ej jachDI' 'oH, DIvwI' Da, yay'mo'. ghIjlaw' pIch jabbI'ID. ghogh jenqu' HoSqu' lo'DI' jajlo' Qa''e', povaD chuS'ughHey'e', reH vem pem qa'. 'ej ghumDI' 'oH, bIQ'a'Daq, qulDaq joq, chalDaq joq, ghorvamDaq joq tu'lu'chugh je, vaj tugh bIghHa'meychajDaq moDqu'nIS lengbogh 'ej Hopbogh qa'pu'. 'e' vI'Ij. 'ej DaH 'e' toblaw' Dolvetlh. marSe'luS ngab, jachDI' jajlo' Qa'. 'ej ngoDvam ja'lu': qaSbeHDI' QI'lop poH, yo' qIj mangpu''e' DIquvmoHrupDI', jach po Ha'DIbaHvetlh qaStaHvIS rammey naQ. 'ej jachtaHvIS, ghorDaq lengQo' qa' Hoch net Har: ngIlbe' chaH. pIvmoH ram muD. 'ej tar lIngbe'choH tI. jonbe'nIS Sor HoSDo'. luj qa' SeHwI'pu'; quvqu'mo' poHvetlh potlh, 'ej Dunqu'mo'. Horey'So vIQoypu' je 'ej loQ vIHar. 'a SuH: nIH HuDvetlh jen rambIQDaq yItlaw'taHvIS, ngup Doq tuQ po. ma'avtaH 'e' wImev. SaqeS je: *Hamlet* QupvaD Hoch wIleghbogh, qaStaHvIS ram, wItey'. vI'Iprupbej: *Hamlet*vaD jatlhrup maHvaD tambogh qa'. ghaHvaD wISovmoH, vangmoHmo' wo' Qu'maj, 'ej 'utmoHmo' parHa'ghachmaj. Qoch'a'? marSe'luS wIruch, Satlhob. 'ej nuqDaq ghaH wItu', qaStaHvIS povam, 'e' vISov. maghoS. [mej chaH] lut 'ay'Hom cha' ta'qach'a' qumpa'. ['el *tlhaw'DIyuS*, *ghertlhuD* je, *Hamlet* je, *polonyuS* je, *layerteS* je, *voltImaD* je, *qornelyuS* je, jawpu' je, toy'wI'pu' je] tlhaw'DIyuS Heghpu' loDnI'wI' vIparHa'bogh: *Hamlet*. wej 'e' wIlIjmeH, ghu rur De'vam: Qupchu'. 'ej 'It tIqDu'maj, bIH DIDamoHmo', 'e' ra' lurDech. 'IQwI' wa' Huy' lughajmeH tay'nIS 'ej gheghnIS wo'wIj ngan QuchDu'. 'ach tIqwIj Suvmo' rIntaH noHbogh yabwIj, ta' vIqelmeH jI'IQba' 'ej jIvalba', DotlhwIj vIqawmo' je. vaj ben be'nI'wI', DaHjaj ta'be'nalwI' je, Qojbogh wo'vam ta'cho'qoch je, --- jIQuch 'e' jeylu'law'DI', HaghDI' wa' mIn, 'ej nIjDI' wa' mIn latlh, nolDaq jIloppu'DI', tlhoghDaq jISaQDI', Dotlh Quch, Dotlh 'IQ je 'ay'mey rap vIlelDI' --- vISawpu'. ghu'vamvaD SuqeSpu' je, valwI'pu' quv, 'e' vIbotbe'. 'ej ghu'vaD SughIbpu', SaraDbe'taHvIS. Satlho'. DaH ghu' boSovchu'bogh wIqelnISchoH. puj HoSmeywIj 'e' noHlaw' *vortIbraS*. pagh, Heghpu'mo' loDnI'wI' vIparHa'bogh, wo'Daq Dach Sun, matlhwI'pu' je 'e' Harlaw'. 'ej nIvchoH ghaH 'e' naj. ghaH DorDI' qechvam, munuQbe'Qo' ghaH, jIHvaD QumtaHvIS. loDnI'wI' yoHqu'vaD ben Sep Hoch'e' jeghpu'bogh vavDaj, chaw'taHvIS chut Hoch --- vIjeghnIS 'e' Del Hoch muQumpu'bogh. wejpuH ta'meyvam chav. DaH qepvamDaq, jIvangmeH jIH malja' wIbuSchoHjaj. chay' Hech be'nI'puqDaj DaH wej 'e' Sovlaw' *DuraS* pIn, *vortIbraS* Qup SoSloDnI', reH ropmo' 'ej QongDaqDaq yIntaHmo'. ghaHvaD jIQum. Sepmaj 'ay' latlh Dan nuvvetlh 'e' nISnIS ghaH. Sep latlhDaq muvmoH nuv net tuchnIS, SepDaj yoSmeyvo' ngaqwI'pu', ghuvpu' je, negh je muvmoHpu'mo'. Hat. 'eH, *voltImaD*, *qornelyuS* je, pIn qanvaD vanvam boqengmeH DaH SangeH. woQ'e' lIchaw'nISbogh malja'vam neH Sanob. Sumatlh --- SumoDmo' 'e' yI'ang. Qapla'. qornelyuS, voltImaD mamoDmeH, 'ej latlh Hoch wIchavmeH, ta', SoHvaD mamatlh chIch 'e' wI'angrupbej. tlhaw'DIyuS 'e' vIHonQo'. Qapla'! SIbI' pemej. [mej *voltImaD* *qornelyuS* je] toH, SuH! *layerteS*: SoHvo' chu' De' nuq? chotlhobqang 'e' choja'. 'ut nuq, *layerteS*? Qo'noS pIn'a'vaD Qu'lIj vay' DatlhobDI', jochbe'chugh Qu', vaj temlaHbe' pIn'a'. toH, nuq DapoQqangchugh, *layerteS*oy, vaj vIta'Qo' DapoQDI'? pagh, qar'a'? wa' porgh lujeSchu'lI' qar'a' tIq, yab je. 'ej nujvaD toy'chu'lI' qar'a' ghop po'. vaj Qo'noS ta'vaD toy'chu' je vavlI', wo' qum wIjeStaHvIS. yIja', *layerteS*: DaH nuq Daghajqang? layerteS HajmoHbogh joHwI', romuluSDaq jIchegh tugh 'e' yIchaw'neS. SoHvaD jImatlh, bIche'choHDI' 'e' 'angmeH, Hu' pa'vo' Qo'noSDaq jIghoSqangpu'. 'ach romuluS luqImqa' yabwIj, tIq je, rInpu'DI' Qu'wIj; SoHvaD 'e' vIchID. 'ej chaw'lIjvaD yab, tIqwIj je vIqoy'moH. tlhaw'DIyuS 'ej vavDaj chaw' ghaj'a' ghaH? 'eH, *polonyuS*. polonyuS QIt jIHvo' chaw'wIj ghajchoHta', joHwI', mutlhobqu'lI'mo' ghaH 'ej nIDqu'mo'. vaj rInDI' ghu'vam, mejmeH chaw' vInob 'e' chav 'ej naw'ta', QatlhtaHvIS je Qu'. vaj joH, qatlhobqu'. mej ghaH 'e' yIchaw' je. tlhaw'DIyuS toH, poHlIj Qup yItIv, *layerteS*oy. poHlIj yISeHtaH SoH. 'ej poH Dalo'meH wIvlIj DaneHDI', Qochjaj pagh. DaH: *Hamlet* --- qorDu''a'ghotwI' quvqu', puqloDwI' je. Hamlet [pegh'egh] qorDu'Hom 'oH. 'ej puqvaD qorlu'law'. tlhaw'DIyuS qatlh qaStaHvIS poH'a', Sut qIj Dachoq? Hamlet ghobe'. quploD ghaHbe'law' puqloD'e'. vaj pagh vIcho'laHlaw', joHwI'. ghertlhuD luSpetHey Sut yIwoDta', *Hamlet* QaQ. 'ej Qo'noSta'vaD jup mInDu' tI'ang. lamDaq vavlI' quv lom yInejtaHQo', reH yav DabejtaHvIS. reH motlhqu' ghu', reH 'e' DaSovbej. HeghnIS yInbogh Hoch. 'u'Daq ghomHa'nIS Hoch, 'ej 'u'vo' yaH. Hamlet HIja', joH. motlh. ghertlhuD toH, motlh 'oH 'e' Dalajchugh, vaj qatlh DabuSlaw'taH? qatlh reH bI'Itlaw'? Hamlet jI'Itlaw''a'? Qo', joH. jI'Itbej jIH. "'Itlaw'"'e' vISovQo'. muDelchu'be' wovHa'bogh wepwIj neH, SoS QaQ. ghobe'. muDelchu'be' 'ItmeH lurDech Sut qIj, tlhuH joq vIraDnISbogh vItlhovchoHDI', mInwIjDaq lIngtaHbogh bIQtIqHey joq. jI'IQmeH chen, qoj nargh, qoj 'ang'egh DotlhwIj, 'ach jIH muDelchu'be'. teH. 'Itlaw' Hochvam, chIch reHmeH Hochvam DalaHmo' ghot vay'. 'ach vay' vIngaS, 'ej 'Itlaw'wI'mey jey 'oH. 'ej 'oH lu'ang 'ej Dor neH DotlhHey Sey, joH. tlhaw'DIyuS qa'lI' vInaDnIS 'ej "bImatlh" vIjatlhnIS, vavlI'vaD 'ItmeH Qu' Davangmo', *Hamlet*. 'ach ben vavlI'vaD lojpu' vavDaj'e', 'ej lojbogh vavDajvaD loj vav. yItlhoj. vaj 'ItmeH Qu''e' ra'bogh puq lurDech lutoy'nIS yInmey, rInpa' poH nI'be'. 'ach multaHbogh Dotlh 'IQqu' qaplu'chugh, vaj multaHmo' quvHa'qanglu'law' neH. qoHvam DaQo' SuvwI'. lalDanvaD tlhIvqu' 'e' 'ang. boH yabvetlh. Hub'eghbe'law' tIqvetlh. QIp Sovvetlh, 'ej DuSaQDaq SaHlaw'Qo'. qaSnISbej ghu' wISovbogh. motlhqu'mo', vay' qetlh'e' neH lutu'bogh nochmaj rur. vaj qatlh, maDoghtaHvIS wIqeHtaHmo', wISaHnIS maH? baQa'! lalDanvaD HeS 'oH. Heghpu'wI'pu'vaD HeS 'oH. 'u'vaD HeS 'oH. meqlaHvaD taQ 'oH. "HeghnIS vavpu'ra'", reH maq meqlaH. 'ej Heghpu'DI' lom wa'DIch, HeghDI' je wa'Hu' lom, reH jach meqlaH: "qaSnISbej". Dotlhvam 'IQ lI'be' yIwoD; qatlhob. 'ej SoHvaD vav jIH 'e' yIHarchoH. 'eH, qImjaj qo'. ta'cho'vaD wa'DIch SoH. puqvaD muSHa'ghach quvqu' 'angqang vav. SoHvaD muSHa'ghachvam vI'ang je jIH. toH vulqanDaq DuSaQ Da'elqangqa'law'. 'ach neHtaHghachwIj Qochqu' nab Daja'bogh. qatlhob: naDev yIratlhqangchoH. naDev Dubejjaj Quchbogh, belqangmoHbogh mInwIj: 'utlhghomwIj la', qorDu'ghotwI', puqwI'. ghertlhuD lujbe'jaj Qu''e' neHqu'bogh SoSlI'. vulqanDaq yIghoSQo'. yIratlhneS, *Hamlet*. Hamlet SoSwI', jIloblaHtaHvIS, SoH qalobrup. tlhaw'DIyuS may 'ej muSHa'bej ghaH, nujangpu'mo'. toH Qo'noSDaq bIratlhtaHvIS, HIDa. reH 'e' vIchaw'. ta'be', yItlha'. jIQuchqu'. QochQo'mo' *Hamlet*, raDlu'be'taHvIS, batlh DataHvIS ghaH, jIHvaD HaghchoH tIqwIj. vIlopchu'meH, DaHjaj HIq vay' vItlhutlhDI', jIQuchqu' 'engvaD 'e' luja' bach'a'. 'ej tlhutlhtaH ta' 'e' Qoyqa'moHtaH chal, 'ej chuSlaw' ralbogh 'engmey. Ha'. maghoSjaj. [mej *Hamlet* nopbogh Hoch'e'] Hamlet va, tetjaj porghwIj lamqu' lamqu' lamqu'! tugh ngoSjaj 'oH, 'ej ram SISwI' neH mojjaj! pagh, HoH'egh wej quvHa'choHbogh SuvwI' 'e' chaw'jaj neH chaw'Qo'bogh batlh tIgh'e'! QI'yaH! QI'yaH! va, jIHvaD Doy'law', raghlaw', qetlh 'ej lI'be'law' qo' malja'mey Hoch! baQa'! tI ghom neH ngejHa'be'lu'bogh 'oH. pa' boghpu'DI' tIghu, DaH 'oH luDanchu' pujchu'bogh neH 'ej moHbogh Dochmey'e'. wejpuH qaS ghu'vam jay'! cha' jar neH lom ghaH! ghobe', jIlachbej, "cha'" vIjatlhDI' je. povpu' ben ta'. DaHjaj ta' qellu'chugh, vaj yIH neH ghaH, 'ej qeylIS ghaH ben ta''e'. SoSwI''e' ben muSHa'qu'mo', SoS qabDaq vaQchoH chal SuS 'e' botmeH, SuSmey ra' ghaH. Hu'tegh! jIqawnIS'a'? ghaH wuv SoSwI'. qaStaHvIS ben. pa' SopDI', ghungqa'law'taH. 'ach qaSpu'DI' wa' jar neH! vIQubQo'jaj. Qu'vatlh! pujchu'ghach: "be'" 'oH ponglIj'e'! va, qaSpa' jar neH; Qoppa' waqvetlh'e', vavwI' lom tlha'meH tuQpu'bogh ta'be'nal, bIQHalHey DataHvIS, reH SaQtaHmo' --- tugh, tugh vaj --- Qu'vatlh! 'ItmeH meqlaHbe'bogh targh, poH nI' law', loSmeH ghaH poH nI' puS --- tugh vavloDnI'wI' nay. vav rurchugh ghaH, vaj bong ta' qeylIS Dun vIrurlaH je. rInpa' wa' jar, va, 'oy'choHmeH mInDu'Daj DoqchoHmoHpa' mInbIQDaj qutmey yuDqu' --- naypu'. QI'yaH, qorDu'wem'a' QongDaqDaq moDDI' chaH. chaHvaD ngeDqu'. mIghqu' Dochaj! QaQbe'taH 'ej QaQchoHlaHbe'law' ghu'. 'ach tIq, yISIQ neH; tamnISlI'mo' jatwIj. ['el *Horey'So*, *bernarDo* je, *marSe'luS* je] Horey'So nuqneH, joH quv! Hamlet jIQuch bIcheplaw'mo'. *Horey'So*! toH, jIlIj'eghchoHruplaw' je! Horey'So jIHbej, joH QaQ. 'ej reH toy'wI'lI' jIHrup. Hamlet jupna'wI' SoH, qaH. pongvetlh matlh qamechqang. qatlh vulqanvo' bIghIQchoHlaw', *Horey'So*? *marSe'luS* SoH, qar'a'? marSe'luS joH quv --- Hamlet jIQuch qaleghmo' je. nuqneH, qaH yoH. 'a SuH! yIja': qatlh vulqanvo' bIchegh? Horey'So jIbuDqu'mo' jIHaDchoHQo', joH QaQ. Hamlet va, pumvetlh jatlhchugh je wa' gholna'lI', vaj vIHarQo'. 'ej teSwIj yIngorQo', Dupumbogh mu'lIj'e' DavoqmoHmo'. bIbuDlaHbe'ba'. Ha' qatlh *tlhIn*Daq SoH? bItlhutlhqu' 'e' pIghojmoHlaw' bItlheDpa'. Horey'So joH, vavlI' nol vIbejneSmeH jIcholpu'. Hamlet DuSaQ tlhejwI'wI', HIvaqQo'. qatlhob. va, SoSwI' tlhogh Dabejlaw'meH bIchol. Horey'So toH quqlaw' taymeyvetlh, joHwI'. jIchID. Hamlet vu'bejmeH! vu'bejmeH! yIqIm, *Horey'So*: bIrDI' nol chabmey, tlhoghDaj vaSDaq jablu'. QI'tu'Daq jIHtaHvIS, veqlargh vIleghchugh, vaj ghu' vImaSbej. tlhoghDaj jaj vIlegh, not 'e' vImaS, *Horey'So*. va, vavwI' --- vavwI' vIleghlaw'. Horey'So nuqDaq? Hom: va, yabwIj mInHeyDaq vIlegh, *Horey'So*. Horey'So wa'logh vIleghpu'. toH, ta' QaQqu' ghaHlaw'. Hamlet loDna' ghaH jay'. 'ej laHDaj Hoch vIqelDI', vaj not ghaH rurbogh latlh vIleghqa'laH. Horey'So joH, wa'Hu' ram vIleghlaw'. Hamlet 'Iv legh'a'? Horey'So ta'. vavlI'. Hamlet ta'? vav? chay'! Horey'So bIyay' loQ 'e' yISeH, 'ej qImjaj teSlIj. nutu'taHvIS cha' qaHvam, DaH nom SoHvaD wanI'vam taQ vIja'. Hamlet vI'Ijjaj jay'! Horey'So SuH: 'avmeH tay'taHvIS cha' qaHvam yoH, *marSe'luS* qu', *bernarDo* je, 'ej qaSDI' cha' ram ramjep, rep chImqu' je, luqIHlu'. 'etchajDaq nargh vavlI' quv rurbogh vay''e'. porgh naQ yoDSutmey tuQmo', Suvruplaw' ghaH. 'ej QIt chaH juS ghaH, nurDaj leHtaHvIS, 'ej 'IQqu' gho'meH mIwDaj. wejlogh juSta', bejtaHvIS mInchaj bItqu' merbogh ghaH. 'ej chuqDaj juvlaH Sa'naQDaj. 'ach qaSDI', yay' chaH. vaj pugh lumojlaw' tetlaw'mo'. vaj tam, 'ej Qam, 'ej ghaHvaD jatlhchoHQo'. jIHvaD ghu' naQ lutey' chaH, HajtaHvIS. 'ej qaStaHvIS ram wejDIch, 'avDI' chaH, vItlhej. 'ej qaSbej ghu' luja'pu'bogh. pay' mu'meychaj lu'ollu' 'ej lutoblu'. Dochvetlh'e' Hu' luDelbogh rurtaHvIS, nuchol narghwI'. 'ej ghaH, vavlI' rur law', ghopDu'wIj rurchuq puS. Hamlet 'a nuqDaq qaS? marSe'luS joHwI', 'avwI'Daq jenDaq. pa' ma'avtaH. Hamlet 'ej ghaHvaD Sujatlhbe''a'? Horey'So joH, jIjatlhpu'. 'ach jangmeH pagh mujatlh. toH wa'logh chaq nach jenmoH. vIHchoHmo', ghaytan vaj jatlhrup. 'ach qaSDI', jachqu'choH jajlo'ghogh Qa'. 'ej chuSDI', Haw'meH moD ghaH. maHvo' ngab. Hamlet Hujqu'. Horey'So jI'IpmeH, yIn vISuDrupneS, joH quv: teHqu'. 'ej ghu' pIja', 'e' poQ vajQu'maj, mamatlhmo' 'e' wIHar. Hamlet maj, maj, qaHpu'. 'a jIHvaD nub wanI'vam. DaHjaj ramjep Su'avqa''a'? mar, ber je: HIja'. Hamlet yoDSutmey tuQ, qar'a'? mar, ber je: yoDSutmey, joH. Hamlet nachvo' qamDu'Daq? mar, ber je: naQ, joH. Hamlet vaj nach'e' boleghlaHbe'. Horey'So wIlegh. mInyoDDaj teqpu'. Hamlet qej'a' mInDu'Daj? Horey'So nachDaj 'IQlaw' law', joH, 'oH QeH puS. Hamlet chIS'a'? Doq'a'? Horey'So reH chISqu'. Hamlet 'ej tlhIHDaq mInDaj buSmoH'a'? Horey'So chIch buSqu'. Hamlet pa' jIHchugh neH! Horey'So bISaHchugh, vaj Dumerqu'. Hamlet ghaytan, ghaytan. nI''a' pa' ratlhmeH poHDaj? Horey'So QIt wa'vatlh toghlaH vay', pa' ratlhtaHvIS. ber, mar je: nI'qu', nI'qu'. Horey'So vIleghDI', nI'qu'be'. Hamlet 'ej chISchoH rolDaj, qar'a'? Horey'So yIntaHvIS rolDaj ghajbogh rurchu'. qIj 'oH, 'ej 'oHDaq DanchoH ghItlhmey chIS. Hamlet qaStaHvIS ram, jI'av. chaq yItqa'. Hom: DIch. Hamlet vavwI' quv qab, mInDu' je ghajchugh ghaH, vaj poSchoHchugh je ghe''or, 'ej jItammeH mura'chugh je, vaj ram: ghaHvaD jIjatlh. Hochra' Satlhob. wanI'vam taQ bopeghchugh, qaSpa' DaHjaj, vaj wej 'oH lupeghHa'jaj ghoghmeyraj tam. tugh qaSchugh ghu' latlh vay', vaj vumjaj yabraj, 'a vumbe'jaj jatraj. jupwI' boDataHmo', Savan. Qapla'. qaSpa' rep wa'maHcha', 'avwI'DaqDaq SaSuchbej. Hoch: joH, mamatlhtaH 'ej pIvan. Hamlet Qo'. HIparHa'taH, SaparHa'mo' je. Qapla'. [mej *Hamlet* nopbogh Hoch'e'] Hamlet yoDSutmey tuQ vavwI' lomqa'! qay' vay'. Hu' qaS wemna', DaH 'e' vIpIHchoH. tugh SaHjaj ram. yIloSlI' SaHpa', tIqwIj. reH ghot mInDu'vaD narghnIS Haw'bogh HeS. bIH DItu'be'meH So'chugh je qIbHeS. [mej] lut 'ay'Hom wej *polonyuS* juH pa'. ['el *layerteS*, *'ovelya* je] layerteS toH, DujDaq tepwIj lanlu'. vaj Qapla'. be'nI'wI', chaw'DI' romuluS neHmaH, 'ej boQDI' lengbogh Duj, vaj yIbuDQo', 'ej De'meylIj HISovmoH. 'ovelya DaHon'a'? layerteS *Hamlet* bangvI'Hey ram DaqeltaHvIS, ngongna', 'IwQuj je neH 'oH 'e' yIHar. DISbov Qup naH 'oH. 'eqqu' 'a taHQo'. Doj 'a ratlhQo'. He' tup 'ej belmoH tup. 'a tugh loj Hoch. 'ovelya loj'a' neH? layerteS 'e' yIHar. puqHom mojHa'lu'DI', HoSchoH Somraw, 'ej tInchoH porgh. 'ach 'ItlhDI' Dotlhmaj Doj, po'choH je yabmaj, qa' je laH Hoch'e' So'taHbogh porgh. DaHjaj chaq DumuSHa'. 'ej HechtaHvIS yuDHa', DaH 'e' Sorghbe'laH naDHa'ghach, tojrupghach je. 'ach yIyep: patlh'a'Daj toy'nISmo' je toy'moHwI'vetlh, vaj neHtaHghachDaj loblaHbe'bej ghaH. ghot ram Dabe'nISmo', nay' pe'laHbe' ghaH. pIvmeH 'ej taHmeH wo'maj, wIvDaj wuvtaH wo' naQ. vaj wIvDaj vuSnIS wo'porgh vuD, Qochbe'ghach je, porgh nachHey Damo' ghaH. toH SoHvaD jatlhchugh je: "bangna'wI' SoH", vaj mu'Daj tob chav'e' neH ta'laHbogh patlh DotlhDaj je wa' ghot. 'ej 'e' DapIHchugh, vaj yonnIS yablIj. 'ej Do' mu'Daj tobmeH lulajnIS Qo'noS che'bogh ghoghmey law''e'. 'ej bIquvHa'choHlaH, bomchaj Da'Ijchugh bIvoqchu'taHvIS, pagh, ghaH toy'chugh tIqlIj, pagh, boHmo' poQtaHvIS, SeH'eghtaHQo'vIS, chIch ghaHvaD be'batlhlIj DapoSmoHchugh. DuHvam yIqelchu'. 'ej yIyep, *'ovelya*. yIyep, be'nI'oy. 'ej DuDevqangchugh muSHa'ghachDaj, vaj 'o'DajDaq yIpol'egh. neHtaHghach pu' chuqvo', Qobvo' je DoH! 'IHtaH be' yepqu', maSvaD neH 'e' 'angchugh, vaj ngIlqu' be'vetlh. HIvrupchugh pumHa'ghach vaj junlaHbe' je batlh. tIghumey chu''e' pIj ngejtaH gharghmey, narghpa' naHmeychaj. 'ej SIStaHvIS Dotlh Qup rambIQ, pobIQ je, nom qaSnIS ngejbogh ropmey. vaj yIyep. Qaghbe'meH vanglu'Qo'DI', toD'eghlu'. lotlh'egh Dotlh Qup, wej buQtaHvIS je ghu'. 'ovelya paQDI'norgh QaQ Damaqpu'bogh vIpolbej. 'ej tIqwIj 'avjaj. 'ach, loDnI'wI' QaQ, ghobyaS puS yIDaQo': QI'tu' He Qatlhqu' lu'ang, He buD qaDbe' lughoStaHvIS. HemwI' SuDwI''a' je tlhIvwI' je Da chaH, 'ej qeSchaj qImrupbe'. layerteS toH, HIpIHQo'. jIratlhtaHqu'. 'a SuH, DaH chol vavwI'. ['el *polonyuS*] layerteS cha'logh chonaDmo', cha'logh vaj jIDo'. cha'logh mavanchuqmo', vaj Quchbej ghu'. polonyuS *layerteS*, wej tlheD'a'? 'eH, tIj! tIj! wejpuH! jonta'lIj laQchoHlu', 'ej SoH nIloStaH. SuH. naD yISuq. [*layerteS* nachDaq ghopDaj lan] 'ej yabDaq qeSvam puS yIghItlhchu'. jatlIj lulo'Qo'jaj qechlIj. 'ej ghu'lIj SujlaHlaw'chugh qechlIj vay', vaj qechvam yIvangQo' je. yIqejHa', 'a jup DawIvtaHvIS, batlh yIQutQo' je. jup Hoch Daghajbogh tobchugh ghu'mey poH je, vaj qa'lI'Daq DabaghmeH mIr tIlo'. 'ach tachlIj SuchchoHbogh mIywI' vay''e' DatIvmoHmeH Qopbe'jaj vanbogh tochlIj. bISolnISbe'taHmeH yIyep. bISolDI', yISuvchu'; SoHmo' yepchoHjaj ghollI'. teSDu'lIj lo'jaj Hoch. 'a chIch ghot puSvaD vuDghogh yI'lo'. yIqImqu', noHDI' vay' --- yojlIj DapeghtaHvIS. chIch waghjaj SutlIj, yapchugh HuchjolIj, 'ach taQQo'jaj bIH. qutlhbe'jaj bIH, 'ach napjaj bIH: loD'e' pIj Del Sut tuQbogh. 'ej SutSarmey noHDI' po'qu'bej romuluS patlh ghot, chuQun je. ngIpwI' nojwI' joq yIDaQo'. bInojDI', pIj tugh loj Doch Danojpu'bogh, juplI' je; bIngIptaHchugh, vaj vu'meH bIpo'Ha'choH. potlhqu' wa' Qu''e'. SoHvaD yIyuDQo'. ram tlha'ba' pem, qar'a'. vaj tlha' je ghu'vam: ghot HochvaD bIyuDHa'nISmo', bIquvbej. Qapla'. 'ej SoHvaD qeSwIj boQjaj naDwIj. layerteS jImejneS 'e' yIchaw'. polonyuS DupoQlI' poHlIj. vaj Ha' toy'wI'pu'lI' tIvu' yIghoS. layerteS Qapla', *'ovelya*. qeSmeywIj qaja'bogh tIqawchu'taH. 'ovelya lu'. yabwIjDaq vIweghta'. 'ej yabwIj poSmoHwI' DapoltaH SoH. layerteS Qapla'. [mej] polonyuS Suja'chuqDI', nuq jatlhpu' ghaH, *'ovelya*. 'ovelya joH *Hamlet* qelneSbogh vay''e' mujatlhpu'. polonyuS majQa'. 'oH qawlu'chu'. nIteb pIj SoHvaD mobmeH poHDaj nobta', qaStaHvIS Hu'mey; jIHvaD ja'lu'pu'. 'ej mu'meyDaj DaqImmeH nI'pu' poHlIj, 'ej ghaHvaD ghIbqu'pu'. toH, teHchugh ghu'vam --- 'ej teH 'oH 'e' muHarmoHlu'DI', Hojlu' --- vaj bIyajHa''eghlaw'; qaja'nISba'. 'ej batlhvaD Qu'Daj yajnISchu' puqbe'wI'. tlhIHvaD tlhetlh nuq? yIvIt. 'ovelya bangDaj jIH, Hu' 'e' tobneSmeH, joHwI', pIj SoQmey law' mujatlhpu'. polonyuS "bangDaj SoH"? Hu'tegh! be'Hom Soy' DaDa. wej ghu'vam Qobqu'vaD bI'ongchoHlaw'. 'ej bangqoq SoQmeyqoqDaj DaHar'a'? 'ovelya joH, nuq vIHarnIS DaH 'e' vISovbe'. polonyuS baQa', qaghojmoH. ghu SoH 'e' yIHar, SoQvam Da'IjlI'mo' DuSorghtaHvIS. SoQmeyvaD qoghlIj'e' yISoQmoHchu'. 'ej qogh DaSoQmoHbe'chugh --- mu' vImawbej, pe'vIl vIQoDlI'mo' --- vaj pumDI' qoghlIj, qoHna' jIH 'e' vIpumlu'. 'ovelya 'a joH QaQ, "bangwI' SoH" jatlhDI', nong 'ej quvqu' mIwDaj. polonyuS Ha', mIymeH mIwDaj neH 'oH. Hu'tegh! Ha'. 'ovelya 'ej SoQDaj tobchu'meH 'ej ngaqneSmeH, QI'tu' quv buSbogh 'Ip Hoch'e' mujatlh. polonyuS HIja', qoHQa'mey jonmeH janmey bIH. pubtaHvIS 'Iwmaj, tIqvaD ngeDqu' chav, jatvaD 'Ip nojDI' tIqmaj; 'e' vISovchu'. qulqoqvetlh wovtaH law', 'oH tujtaH puS. 'ej qulqoqvetlh cha' Dotlhvam luchu'Ha'lu', lay'taHvIS je chu'wI' --- bIH tojmoHmo'. vaj batlh qulna' 'oH qulqoq'e', puqbe', 'e' yIHarQo'. bIquvmeH, leS ghaH'e' pIj yISuchQo'. 'ej ja'chuqmeH neH bang Dutlhob, "ghghgh" jatlhDI', 'e' yIHon. joH *Hamlet* ngoDmeyvam neH tIHar: DaH Qupqu' ghaH. 'ej yItmeH, weghbogh tlheghDaj reH nI' law', tlheghqoqlIj chaw'lu'bogh nI' puS. nom jatlhmeH: *'ovelya*, 'IpDaj tIHarQo'. SuyDuy bIH. nur'e' lu'angbogh paHchaj lughajbe'. 'ach yonmeH Qu' quvHa'qu' qoy'lI' neH. 'ej tlhu'moHchu'meH chaH, Human 'oSwI' Da: SoQ'a'mey, batlhqoq je lo'. pItlh jIjatlh: joH *Hamlet*vaD QIch mu'mey joq DamechmeH wa' luplIj lenHom Dalo'Ha' --- baQa', qaStaHvIS nemmey, pe'vIl 'e' vIbotbej. yIta'. qara'. mamej. 'ovelya qalob, joHwI'. [mej chaH] lut 'ay'Hom loS 'avwI'Daq. ['el *Hamlet*, *Horey'So* je, *marSe'luS* je] Hamlet choptaHvIS jejlaw' muDvam Ho'Hey. bIrqu'. Horey'So HIvruplaw' muDvam vID, 'ej chopDI' yoHbej. Hamlet DaH qaS rep 'ar? Horey'So wej qaS ramjep, qar'a'. marSe'luS ghobe'. DaH jachpu' tlhaq. Horey'So qar'a'? vIQoypu'be'. vaj yItmeH qa' tugh qaS poH motlh. [chuS lopmeH chuS'ughmey, 'ej 'etDaq baHlu'] nuq lopmeH baHlu', joH? Hamlet DaHjaj QongQo' 'ej lop 'ej tlhutlhqu' ta'. chechqu' yupma'Daj. mu'qaD veSvaD SuvDI', yoHqu' SuvwI''a'qoq, qochpu'Daj je. 'ej romuluS HIq HIvje''a' tlhutlhDI' ghaH, Hugh yayDaj Dun lumaq chuS'ugh, QoQluch je. Horey'So tIgh 'oH'a'? Hamlet tIgh 'oH jay'. toH, wo'vam Sung jIH. jIHvaD motlhtaH tIghvam, jIyIntaHvIS. 'ach vuDwIj tlhoblu'chugh, vaj tIghvam'e' wIquvmoHqu' wIbIvDI'. 'ej tIgh wIpabtaHvIS, chIch maquvHa'. neHmaH qIbHeS je DopmeyDaq nupumtaH, 'ej pIchmaj ja'choH wo'mey latlh, 'e' qaSmoH nach 'uHqu' chenmoHbogh yupma'vam'e'. "chechwI'na' chaH" lujatlh. 'ej targh DIrur pIj 'e' lumaqmo', lamchoH pongmaj QaQ. DInIDDI', jenqu' chavmeymaj DIta'bogh; nunoymoHmeH Hombotlh DujQuQ je bIH. bIH jotlh je ghu'vetlh. toH, pIj ghotvaD qaS je: DotlhDaj Duy' naS lughaj chaH. chaq boghHa'pu' --- chuntaHvIS, mungDaj wIvlaHbe'mo' ghot. chaq HoSqu' Dujchaj vay', 'ej HoSqu'mo', meqlaHchaj nuH, Surchem je pejchoH 'oH. pagh, chaq belHa'qu'choHmoH DameH mIwchaj, 'oH QopmoHmo' wa' tIgh lupabtaHbogh. wa' Duy'chaj DeghHom neH luqengtaH ghotvam, Dotlhchaj lutoy'nISmo', pagh, puQmo' Sanchaj. toH, qeylIS Dunqu' DameH Dojchugh je batlhmeychaj Hoch, 'ej batlhmey ghajbogh chaH leHruplaHbe'chugh je latlh vay', vaj rambej. ghotvam lunoHlu'DI', Sab batlhmeyvam, SaHmo' neH Duy'chaj. webmeH batlh baSna', naDHa'ghachvaD butlh mIghqu' --- Horey'So 'eH, joH! chol! ['el lomqa'] Hamlet nuQanjaj boQqangbogh 'ej Qumbogh qa'pu'! qa' QaQ SoH'a'? pIch ghe''ormang SoH'a'? QI'tu' naD Daqem'a'? chaq ghe''orvo' qulpummey Daqem'a'? bIHechtaHvIS bIboQqang'a'? pagh bImIgh'a'? ram Hoch. qayu'nISmeH bIchenpu'mo', qajatlh. qapongmeH, *Hamlet* pong vIlo'rup. ta'! Qo'noSngan'a'! vavwI'! SIbI' yIjang! jIjIvmo' tugh jIQay'rup 'e' yIbot. yIja' neH. qatlh lomSut lughormoHlaw'pu' HomDu'lIj'e' Hu' weghbogh Hegh bIghHa', 'ej naDpu'bogh SonchIy? 'ej qatlh DulelmeH poSlaw'pu' naghmey mollIj nujHey 'ughqu'? molDaq pIroQDI', bIvIHbe'chu'bej. chay' ghu' vIyaj? yoDSutlIj naQ DatuQ, lomna' neH SoHtaHvIS, 'ej maSwov DoS DaSuchqa', ram DaghIjmoHtaHvIS jay'! jotrupbogh 'u' qoH, maHbogh, tIq DaSujchu'. 'ej qechmey'e' SIchQo'bogh qa'pu'ma' jubuSmoH. nuqvaD? qatlh? DaH nuq wIta'nIS? [*Hamlet* cholmoHmeH ghop vIHmoH lomqa'] Horey'So SuH, naDevvo' DatlhejmeH ghopDaj vIHmoH. nIteb DuQumqanglaw'. marSe'luS Daq Hop DaghoSmeH DucholqangmoH, DochHa'qu'taHvIS mIwDaj. 'ach yItlhejQo'. Horey'So Qo', joH. yItlhejbejQo'. Hamlet chay'? jIHvaD jatlhlaw'Qo'. vaj ghaH vItlha'. Horey'So Qo', joH. Hamlet qatlh? QobDaj nuq vIHajnIS jay'? jIHvaD mavjop potlh law', yInwIj potlh puS. 'ej qa'wI''e' not QIHlaHba' lomqa', jubmo' qa' Hoch. mura'qa'law'. vItlha'. Horey'So 'a joH, bIQ'a' DaghoS 'e' tlhu'moHneSchugh? pagh, bIngDajvo' bIQ'a' botlh DungDaq HuSbogh 'ej ghIjqu'bogh qoj'a' DaghoSmoHchugh? pa' pumbeHlaw' 'ej chong qoj'a'vetlh jej. pa' chenqa'laH je qa'. 'ej qu'mo' qabDaj, chaq SoHvo' che'bogh yablIj laHmey nge'laH. bImaw'choHmeH DujotlhlaH. ghu' yIqel. yab HochDaq 'Itchu'meH Qujqechmey lanlaH Daqvetlh neH --- 'ItmeH DachtaHvIS meq latlh --- qelI'qam law' bIQ'a'vetlh ral lubejmo', 'ej bIngDaq jachqu' 'oH reH 'e' luQoymo'. Hamlet DacholchoH neH ghaH. Ha' yIghoS. qatlha'. marSe'luS pa' bIcholbe'. Hamlet jIHvo' ghopDu' tIteq. Horey'So yIra''eghchu'. pa' yIghoSQo'. Hamlet jach SanwIj. 'ej porghwIj 'aDHomDu' Hoch letmoHmo', DaH bIH rotlh law', veqlargh Somraw rotlh puS. mura'lI'. qaH, jIHvo' ghopDu' tIteq. baQa', lomqa'na' moj munISbogh ghot. vIjatlh: peDoH. Ha', qa'! yIghoS. qatlha'lI'. [mej lomqa' *Hamlet* je] Horey'So 'Itqu'choH ghaH, qech jochqu' buStaHmo'. marSe'luS wItlha'nIS. mujbej Qu'maj, ghaH wIlobchugh. Horey'So SIbI' vItlha'. wanI'vammo' tlha' nuq? marSe'luS Hu'tegh, DaH Qo'noS wo'Daq nonlaw' vay'. Horey'So Do' ghu'Daj naQ che' San. marSe'luS Qo'. SuH, wItlha'. [mej chaH] lut 'ay'Hom vagh 'avwI'Daq yoS latlh. ['elqa' *Hamlet* lomqa' je] Hamlet nuqDaq choDev? yIjang! jIghoStaHQo'. lom: HIqImchu'. Hamlet lu'. lom: tugh qaSqa' bIjmeH repwIj. 'ej joy'bogh 'ej He'So'bogh qulmeyDaq jIjegh'eghnIS. Hamlet va, bIDo'Ha'ba', qa'. lom: Qo', HIvupQo'. 'a ngoD qaja'rupbogh tI'Ijchu', 'ej tIbuS. Hamlet yIja'. qa'Ijrup. lom: bortaS Data'rup je, cho'Ijpu'DI'. Hamlet nuqjatlh? lom: vavlI' lomqa' jIH. qaStaHvIS ram jIyItnISmeH vIqIchlu', taHtaHvIS HupmeH bov. 'ej qaSDI' po, jIpaylI'meH bIjqulmeyDaq vIweghlu' --- HeSmeywIj webqu' Hoch vIta'pu'bogh, qaStaHvIS yInwIj jaj, vISay'moHpa', 'ej bIH vIqIlpa'. toH bIghHa'wIj peghmey vIja' net chaw'chugh, vaj lut Doj vIja'laH. 'ej qa'lI' QommoHlaH lut mu'Hom neH. chaq ghoDajvo' bavHa'laHchugh yuQ vay', vaj mInlIj rurlaH 'oH, lut mu' Da'IjDI'. chevchuqlaH bagh'eghbogh 'ej jeDbogh jIblIj. 'ej Qammo' jIb tlheghDu'lIj Hoch, bIyay'DI', to'baj pachDu' rur bIH, pay' HajDI' 'oH. 'ach 'Iw neH ghajbogh teSvaD bov SanbIjvam ja'be'nISlu'. yI'Ij! baQa', yI'Ij! qaSDI' poH vay', vavlI' DavuvchoHchugh, --- Hamlet QI'yaH! lom: vaj vavvetlh chotlu'mo', quvHa'lu'taHvIS, qorDu'Daj wemlu'DI' --- bortaS yIta'. Hamlet chot'a'? lom: quvHa'qu' chotDI'. reH quvHa' chotwI'. 'ach chotDI' Hujqu', wemqu', 'ej quvHa'qu'. Hamlet SIbI' HISovmoH. vaj yabqech, bang choH joq vIDataHvIS jImoDqu'mo', bortaSvaD jIHIv. lom: bIvangrupba'. bISuvnISDI', chaq vulqan tI DaDachugh je, bIbuDmo', vaj Qu' Davangrupbej. HI'IjchoH, *Hamlet*. naHSormey ghomwIjDaq jIQongtaHvIS, mu'aw'pu' ghargh net maq. 'ej Qo'noS qoghHey lutojbejpu' webwI'pu', Hegh luja'DI', chIch ngebmoHmo'. SuvwI' quv, ngoD yISov: vavlI' mIv'e' DaH tuQ vav 'aw'pu'bogh Hu' gharghqoq'e'. Hamlet tIqwIj: leSSov vIghajlaw'! vavloDnI'wI'! lom: HIja'. tlhogh wembogh, 'ej qorDu'Daj ngaghbogh petaQ! DaH nga'chuq tuHnIStaHvIS chaH, 'e' lajmeH quvlaw'qu'bogh be'nalwI', 'urmangDaj nobmey much, 'ej 'ongchu' yabDaj. vaj Qapta' ghaH. Qu'vatlh, bImIghbej, yab! SumIghbej, nobmey, be' botojlaHchu'mo'! Sab be'nal Dotlh jay', *Hamlet*! jIHvo' pum. 'ej reH nur leHtaHmo' muSHa'ghachwIj, vaj tlhoghvaD 'Ip vIlay'bogh DorbeHbej 'oH. 'a DaH petaQDaq pum. 'ej SupwIj vay' QaQ law', petaQvam jo QaQ puSqu' jay'! batlh'e' not ponlaH ngaghbogh wem, qar'a'; ponmeH, QI'tu'ngan rurmeH chenchugh je. toH, vaj quv wovqu' muvchugh je wemDotlh, vaj DalchoH batlh QongDaq 'e' Har, 'ej tugh veQ Sopqang! QI'yaH! jajlo' vIlarghlaw'. nom jIja'nIS. qaStaHvIS pov, SorghomwIjDaq jIQong. reH tIghwIj 'oHtaH. pa' jIQongtaHvIS, qaStaHvIS jIHubbe''eghmeH len rep, mucholmeH pegh'egh vavloDnI'lI' 'ong. 'ej *He'benon* tItaS HIvje'Hom qengDI', qoghDu'wIj 'ochDaq DIrroptaSvam chaghmoH. yoq 'IwvaD ghol luDamo' taSvam HoSmey, tugh porgh lojmItmeyDaq, porgh HemeyDaq je moDqu' bIH. moDDI', 'aj toQDuj lurur. jeDchoH 'ej SubchoH pIvtaHbogh 'Iw yIQ, 'ej ghu SojtaS rur, nonmo' wIbchoHDI'. tugh nom 'e' chav 'oH. jeDchoHpu' je 'IwwIj. 'ej vaQbogh porghwIj Dech DIrnaghHey letqu'. 'ej muroSHa'moH HIghbogh rop DIr mo'Hey web'e'. vaj jIHvo' be'nal, yIn je, ta'mIv je nge'pu' loDnI'wI' ghop, 'ej quqpu' Hoch. murInmoHta', jIchun'eghchoHmoHpa'. mInDu'wIj bej, 'ej lomDaq jach pagh vaj. yo' qIj vI'elrupbe'. loj paymeH 'ebwIj. Qu'vatlh! 'ej Duy'wIj Hoch vIqengtaHvIS, tugh mughIpDIjchu'meH veqlargh, mungeH. QI'yaH! Ha', QI'yaH! vav Davuvrupchugh, vaj ghu'vam yISIQQo'. qorDu'wIj wemmeH 'ej ngaghmeH neH taHqeq, lI' ta' QongDaq, Qo'noSDaq 'e' yIbot. 'ach Qu' DanIDDI', SoSlI' DaQIHmeH SoH, 'oghbe'jaj qa'lI'. 'ej joch'eghQo'jaj yablIj. ghaH lubIjjaj veqlargh meqba''a', tIqDaj 'oy'moHbogh 'ej 'aw'taHbogh pach jejqu''e' je. QI'yaH! naDev jIratlhlaHbe'. tugh qaSchoH po, 'e' 'ang ghargh wov. 'ej qulDaj tlhIb rIHHa' 'oH. Qapla'. qamej! qamej! qamej! HIqaw! [mej] Hamlet QI'tu' mangghom! ngeHbej! QI'yaH, nuq latlh? ghe''or vIpongnIS'a' je? SuH, SIQ, SIQ, SomrawwIj, 'ej SIbI' peqanchoHQo'. jIQamlaHmeH HIboQ! peHoS! "HIqaw"? lomqa' Do'Ha'qu', tamey leHlaHtaHvIS maw'rupbogh nachvam! chay'? "HIqaw"? HIja', yabwIj HablI'vo' ghItlhmey Dogh ram Hoch vIQaw'bej. paq paQDI'norgh Hoch. qech Hoch. ngoDmey Hoch'e' ben qonpu'bogh qoj tu'bogh yablaHwIj Qup. nIteb yab paqwIjDaq, HablI'Daq je ratlh Qu' chora'pu'bogh. pa' lam quvHa' DuDbe'lu'bej. ghuy'cha'! be' mIghqu'! taHqeq! taHqeq! Haghbogh webbogh taHqeq! nuqDaq ghItlhpaqwIj? ngoD vIqonnISba': HaghlaH 'ej HaghtaH je taHqeq quvHa'. Qo'noSDaq qaSlaH DaH 'e' tobbej ghu'. [ghItlh] pItlh, vavloDnI'. DaH SoQ vIqelnISqa'. nuq jatlhpu' ghaH? "qamej! qamej! HIqaw!" vI'Ipchu' rIntaH. Hor, marSe'luS ['o'vo'] joHwI'! joHwI'! marSe'luS ['o'vo'] joH *Hamlet*! Horey'So ['o'vo'] Qanjaj qeylIS! Hamlet toH, vaj qaSjaj. marSe'luS ['o'vo'] Ha'! Ha'! Ha' joHwI'! Hamlet HaHaHa! Haghlaw' mang! ['el *Horey'So* *marSe'luS* je] marSe'luS joH, DotlhlIj nuq? Horey'So De' nuq Daghojpu'neS? Hamlet toH! merqu' De'! Horey'So vaj 'oH ghoja'neS. Hamlet Qo'. De' DapeghHa'ba' SoH. Horey'So jIjatlhpa', jatlhbej Hovmey. marSe'luS jatlhbej Hov, joH. Hamlet vuDraj nuq? toH! 'oH HarlaH'a' tIq vay'? 'a De' bopegh, qar'a'? Hor, marSe'luS wIpeghbejneS. Hamlet Qo'noSDaq yInbogh wa' taHqeq web law', Qo'noS latlh Hoch web puS. 'ej --- toH, petaQ ghaH. Horey'So De'vam nuja'meH 'utba' molvo' cheghbogh pagh qa', joHwI'. Hamlet HIja', bIlugh. bIlughba'. vaj lIHmeH wa' mu' latlh vIja'choHbe' je. mavanchuq 'ej matlheDchuq 'e' vIwuq. Qu', neHtaHghach je pabnIS Hoch, qar'a', Sar Hoch wIqelchugh. vay' vIpabnISmo' je --- vaj SuH: Somraw vIqeqmeH DaH jIjaH. Horey'So maw' neH 'ej taQqu' mu'meyvam, joH quv. Hamlet Dumawmo' bIH, jIQoSqu', jup. jIQoSqu'. HIja'. jIQoS. Horey'So ghobe'. mawbe'ba', joH. Hamlet qarbe', *Horey'So*. 'oljaj ghe''or Qang. chIch mawqu'lu'bejta'. HoSDo' vIqelDI' --- yuDHa'bej qa'vetlh. De'vam'e' Saja'laH. 'a nuq wIbuSpu', pa' maja'chuqtaHvIS --- wej 'e' boSovqangchoHchugh, vaj petung'egh. 'ej tugh, Do', Qap SutammeH Qu'. toH, jup: SuvwI', HaDwI' je, jupna'wI' je tlhIHmo', jIHvaD wa' Qu'Hom neH yIta'. Horey'So Qu' nuq? wIta'rup. Hamlet wanI'mey'e' DaHjaj boleghpu'bogh not bopeghHa'. Hor, marSe'luS luq, joH. Hamlet pe'Ip je. Horey'So Hu'tegh, not vIpeghHa'bej, joH. marSe'luS not vIpeghHa' je. Hamlet 'etlhwIjDaq 'e' yI'Ip. marSe'luS wI'Ipta', joH. Hamlet ghobe'. ghobe'. 'ach 'etlhwIjDaq pe'Ipqa'. lom: [bIngvo'] pe'Ip. Hamlet baQa', nuqjatlh? Ha' lomoy! pa' SoH'a'? juppu', Ha'. SomDaq ghotvetlh chuS boQoy. pe'Ipqang. Horey'So nuq wI'IpnIS 'e' ghoQIjneS. Hamlet not ghu'vam Hoch boleghpu'bogh boja', 'etlhwIjDaq 'e' yI'Ip. lom: [bIngvo'] pe'Ip. Hamlet chay'? *vaj Daq wIchoHjaj. qaH, naDev ghoS. 'ej 'etlhwIjDaq ghopDu'raj'e' tIlanqa'. 'eH, 'etlhwIjDaq yI'Ip: not ghu'vam Hoch boQoypu'bogh boja'. lom: [bIngvo'] 'eH, 'etlhDajDaq pe'Ip. Hamlet majQa', lamto'baj! nom yav bIng DalenglaH! po'qu' tlhIlwI'vam! Daq yIchoH, juppu'. Horey'So Hu'tegh! baQa'! Hat ghu'! Hamlet vaj Hat yISIQ, 'ej tujDI', DoplIj qul yIchenmoHQo'. chalDaq, ghorDaq je law'bej Doch, *Horey'So*. 'ej puS Doch'e' neH najlaHbogh je QeDlIj. toH Ha'. jaS peDaQo'. 'ej batlh yo' qIj bo'elmeH: jItaQchugh qoj jIHujchoHchugh jIDaDI', leS chIch qoH tlhaQ vIDa chaq 'e' vIwuqDI' --- qaStaHvIS poHmeyvetlh, tuleghDI' tlhIH, 'eH, not DeSDu' tIbagh. not nach tIjoqmoH. not Honbogh mu'tlhegh vay' tIjatlh je jay' --- vaj not "toH, toH, ghu''e' wISov", "mata'laH, mata'qangchugh" joq, "maja'qangchugh neH" joq, "net chaw'chugh, vaj 'e' ta'meH lutu'lu'" joq. 'ej not SuloymoHmeH SoQghoch yIjunmoH. toH ghu'wIj'e' boSov, not 'e' yIqImmoH. 'ej "Hochvam wIvangQo'" SIbI' yI'Ip. vaj rInDI' Heraj, 'ej bo'elrupDI', Do' lomrajDaq yo' qIjvaD jachlu'jaj! lomqa': [bIngvo'] pe'Ip! Hamlet yIleS, yIleS, qa' Sot. ['Ip chaH] vaj, juppu'wI', Savan 'ej jupna'ra' vIDarupbej. lIvuv 'ej lIparHa'taH *Hamlet* puj, Do' not net 'angmeH Dachjaj 'eb, chavlaH je. Qo', HItlha'Qo'; matay'. patlh tIgh yIbIv. 'ej SuH: lojmIt vay' poSDaq DaqlaH pagh. pupHa'law' bov. va, noDbogh San vIpay. va, qatlh vIlughmoHmeH jIboghpu' jay'! Qo'. Ha' matay'. [mej chaH] lut 'ay' cha' lut 'ay'Hom wa' *polonyuS* juH pa'. ['el *polonyuS* *reynalDo* je] polonyuS 'eH, ghaHvaD Huchvam ghItlhvam je tInob. reynalDo luq, joH. polonyuS *reynalDo* QaQ, bIvalqu', Qu' Data'chugh: chay' Da ghaH, latlhvaD 'e' yIyu' DaSuchpa'. reynalDo joH, 'e' vIHech. polonyuS majQa'! majQa'! yIqIm: wa': romuluSDaq Qo'noS 'Iv lutu'lu'; 'e' vISovmeH yIyu'. chay' ghoSta' chaH. 'Iv chaH. chay' chep chaH. Huchchaj law'moH nuq. 'Iv lutlhej. chay' wagh mIp. puqwI' luSov, QIt 'e' Datu'DI', DechlI'mo' moDQo'bogh bIyu'meH QIch, ghu' potlh yIcholchoHchu' --- 'oH chollaHbe'mo' yu'chu'wI' yuDHa'. DaSovqu'be'law' pa' 'e' HarnIS Hoch. "vavDaj, juppu'Daj puS je neH vISov. 'ach ghaH vISovchu'be'." qIm'a', *reynalDo*? reynalDo qaqImchu', joH. polonyuS "vISovchu'be'bej jIH" Dajatlh net chaw'. "toH, ghot vIqelbogh ghaHchugh, vaj DaHa'taH. chavvam lI'be' parHa'qu'." DaH DapummeH, DubelmoHbogh ngoD ngeb tI'ogh. 'ach Hu'tegh, not luquvHa'moHlaw'meH, ramnIS bIH. Qu'vam yIqIm. wej SuvchoHbogh loD Qup'e' tlhejtaHmo' reHbogh HeSHom motlhqu' tlhIv, vaj HeSHommeyvam ghov 'ej SovtaH Hoch. qaH, HeSvammo' yIpum. reynalDo chaq SuDlaw', joH. polonyuS HIja'. chaq chechlaw'; Hay'law'; tIchlaw'; Sollaw'; toH, chaq ngaghHa'law' --- pumvam'e' qachaw' je. reynalDo 'ach joH, ghaytan bong ghaH quvHa'moH pumvam. polonyuS Hu'tegh, ghobe'. DamaqDI', pum yIpujmoH. ngaghqangDI' SeH'eghbe' ghaH, yIja'Qo'. naDHa'ghach taghlaHmo'. not 'oH vIHechpu'. pumDaj DatlhuptaHvIS, qapHa'nIS QIchlIj. wej Qu' lupabbogh mangHom'e' lulammoH HeSHomvam neH vaj 'e' luHarnIS latlh. Daw'choH 'ej joq neH meQlI'bogh wa' yab. vaQ 'IwDaj'e' wej lobmoHpu'bogh Sun, 'ej Doch Hoch HIvqang ghaH. reynalDo luq. 'ach joHwI' --- polonyuS qatlh Qu'vam yuD Data'nIS? reynalDo joH, HIja', vISov vIneH. polonyuS qaH, ghu'vam'e' vIHech. 'ej maytaH tu'meH mIwvam 'e' vIHar. puqwI' puqHeSHomvam Damaqpu'DI'; 'ej "lamchoH je mIv chu', 'oH mupDI' muD" Daja'DI'; vaj yIqIm: HeSmo', Daja'bogh, DIv QupwI' DajoSbogh, wa'logh 'e' leghchugh ghot DangonglI'bogh, Suja'chuqtaHvIS, vaj, qaH, DIch yIghaj: Suja'chuqtaH 'e' rInchoHmoHmeH ghotvetlh, Dujatlh: "vajna'", "jupwI'" ghap, "qaH QaQ" ghap, Segh wo' je tIgh, pongmIw je pabtaHvIS. reynalDo lu', joH. polonyuS toH, qaH, ta'vam vang --- chay' vang --- va nuq vIjatlhruppu'? Hu'tegh, vay' vIjatlhruppu'. nuqDaq vIja' 'e' vImev? reynalDo "Suja'chuqtaH 'e' rInmoHmeH", "jupwI'" latlh ghap je, "qaH QaQ" je. polonyuS "Suja'chuqtaH 'e' rInmoHmeH." --- HIja'! vaj SoHvaD jatlh: "toH, qaHvetlh Qup vISov. wa'Hu' vIleghlaw', pagh wejHu' vIleghlaw', pagh qaSDI' vay', pagh qaSpu'DI' wanI'vetlh, 'ej vay'vam tlhejpu' ghaH, pagh vay'vetlh tlhejpu'. 'ej qarbej ghu' Daja'bogh. SuDtaH chaH. pagh, chechqu'mo' lengHa'taHvIS, loQ vul. pagh, SolchoH, 'ovmeH vI'qeq jeStaHvIS. pagh, chaq vIlegh, malja' qach 'eltaHvIS. --- vaj, ngagh 'e' DIlmeH qach. "pagh, latlhDaq ghaH." toH, qIm: vIt Qa'vam jonba' tojbogh chablIj ngeb. 'ej DoS wIpuSmeH Sup 'ej SoDnIS pu'maj. maQoDpu'DI' maDoQ, mavalqu'mo', matu'chu'mo' je. SoQwIj qeSwIj je Dapabchu'mo', puqloDwI''e' DapuS je. 'ej peghDaj Sov DaDoQ je SoH, bIQoDDI'. choyaj, qar'a'? reynalDo HIja', joH. polonyuS maj. Qapla'. reynalDo lu', joH. polonyuS chay' Da ghaH 'e' yItu' je SoH. reynalDo luq. polonyuS 'ej QoQDaj qeq 'e' yInISQo'. reynalDo lu', joH. polonyuS Qapla'. [mej *reynalDo*] ['el *'ovelya*] polonyuS nuqneH, *'ovelya*! qay'law' nuq? 'ovelya QI'yaH, vIghIjqu'lu', joHwI', joHwI'! polonyuS Hu'tegh! DughIj maQmIghHey nuq? 'ovelya joHwI', pa'HomwIjDaq SutDegh vIchenmoHtaHvIS, muchol joH *Hamlet*. 'ej QeyHa'chu' wepDaj. mIvDaj tuQbe' ghaH. ghIH paSloghmeyDaj; pumpu' bIH, 'ej qama' qammIrmey rur. yIvbeHDaj rur ghaH, chISmo'. mupchuq qIvDaj. 'oy''a' luQummeH Hechlaw'mo' mInDu'Daj, Qugh ja'meH, ghe''orvo' ghaH ghImlu'law'pu'. polonyuS maw''a' DuneHqu'mo'? 'ovelya 'e' vISovbe', joH. 'ach 'e' vIpIHbejneS. polonyuS toH, nuq Dujatlh? 'ovelya ghopDu'wIj tlhapchoH, 'ej jIHaw' 'e' nISchu'. DeSDaj naQ tIqmoH. Huy'Daq latlhDaj lanmeH, mIwvam pab. qaSDI', qabwIj bejchoHchu'mo', 'oH Hotlhlaw'. Dotlhvam leHmeH nI'qu' poHDaj. rInmoHmeH, DeSwIj QomchoHmoHlaw'DI', 'ej, wejlogh joqmeH nachDaj, mIwvam pabDI', tlhuHchu' ghaH. vupmoHmo' 'ej HoSmo' tlhuHDaj, vaj roDaj DejmoHlaw', 'ej yInDaj HoHlaw'. rInpu'DI', muweghHa'. volchaHDajDaq mubejmeH nachDaj tlhe'taH; HeDaj SammeH, mInDu' lo'be'law' ghaH, pa' HurDaq ghoSpa'. 'ej HurDaq mejpa', reH mubuSlI' tIHchaj. polonyuS HItlhej, Ha'. ta' vISamnIS. maw' muSHa'mo'. teHbej. 'ej ralmo' Dotlhvetlh, Qaw''egh bang, 'ej SuDbogh Qu'mey nIDmeH, yabDaj tlhu'moH. wanI'vam motlhtaH law', pIj Dotlh nong latlh Hoch tlhu'moH puS. SoHvaD jIQoSqu'bej. toH, Hu' Daqunta''a'? 'ovelya ghobe', joH QaQ. 'ach qeSmeylIj vIpabta'. jabbI'IDmeyDaj vIlajQo'. muchollI' reH 'e' vIbot. polonyuS wanI'vammo' DaH maw'law'. jIQoS: vIqImtaHvIS ghaH vInoHHa' 'ej muj leSSovwIj. SoHvaD reHpu' neH, 'ej leS SoH DuquvHa'moH, 'e' vIpIH. 'a Hu'tegh! jIpIHHa'ta'! qanDI' ghot, reH qaDDaj lachruplaw'; 'ej QuptaHvIS, reH qaDDaj machrupmoH. Ha', ta' wIghoS. De' SovnISlu'. wIpeghtaHvIS, maSoy'DI', pegh lot QIH law', ta' QeH QIH puS --- De' QoyDI'. [mej chaH] lut 'ay'Hom cha' ta'qach pa'. ['el ta', ta'be', *roSenQatlh*, *ghIlDeSten*, tlhejwI'pu' je] tlhaw'DIyuS maj, *roSenQatlh*, maj, *ghIlDeSten*, nuqneH! Salegh vIneHba'. jIHvaD 'ut je Qu' Satoy'moHbogh. vaj "tugh pechol" vIra'DI', jImoDnIS. *Hamlet* choHHey De' boQoypu'. vIpongmeH, "choH" vIjatlhnIS; DotlhDaj ngo''e' DaH luleHbe'mo' tIqDaj, porghDaj je. yaj'eghlaH pe'vIl 'e' lunISchu' rIntaH nuq, vavDaj Hegh je, 'e' vIloylaHbe'. vaj tlhIH Satlhob. qaStaHvIS jajraj Qup, Sutay' tlhIH ghaH je, batlh boghojtaHvIS. boSumtaH je, SuQupmo' 'ej SuvIDmo'. vaj loQ naDev monjuHwIjDaq peratlhqang. chaq ghaH botlhejmo', belmey nejqangqa' ghaH. ghaH SotmoH'a' vay''e' wej Do' vISovbogh chaq 'e' botu', boloy 'e' chaw'DI' 'eb. 'ej Seng bo'angDI', Do' chaq 'oH vIvorlaH. ghertlhuD jatlhtaHvIS, pIj lIbuSpu' ghaH, qaH QaQ. 'ej qarbej: tlhIHvaD tIqDaj SumtaH law', yInbogh cha' vay'vaD tIqDaj SumtaH puS. yInmeH 'ej chepmeH ghu' wItullI'bogh, Suquvqang 'ej Suvupqang, 'e' che'angchugh, 'ej loQ naDev SumImchugh, vaj, SuSuchmo', ta' vanvaD 'umbej tlho' boSuqlI'bogh. roSenQatlh maHvaD voDleH DIbHoS boghajneSmo', Qu' chav boneHneSbogh boraDlaHbej. chetlhobnISbe'. ghIlDeSten 'ach batlh relobrupbej. 'ej tlhIH retoy'rupqu'mo', baHbogh pu'HIch wIDaqangbej. vaj DaH majegh'eghneS. chera'meH, qamrajDaq Qu' laHmaj Hoch wIlan, cheraDpa'. tlhaw'DIyuS *roSenQatlh*, *ghIlDeSten* je quv, retlho'. ghertlhuD *ghIlDeSten*, *roSenQatlh* je quv, retlho'. 'ej 'eH: tugh choHqu'pu'bogh puqloDwI' yISuch; Satlhob. Ha', 'eH, peghoS, mang puS. 'ej *Hamlet* DaqDaq qaHvam'e' tIDor. ghIlDeSten maSaHmo' 'ej maQorghmo', beljaj *Hamlet*, 'ej ghaHvaD QaHjaj ghu'! ghertlhuD 'e' chaw'jaj San! [mej *roSenQantlh*, *ghIlDeSten*, tlhejwI'pu' vay' je] ['el *polonyuS*] polonyuS *DuraS*vo' cheghpu'neS Duypu', joHwI'. 'ej cheghDI' Quchqu'. tlhaw'DIyuS reH De' QaQ vav DaDa. polonyuS qar'a', joH quv? toH DIch yIghajneS: jIHvaD potlhchugh qa'wI', vaj jIHvaD potlhqu' ta'vaD, qa''a'vaD je Qu''e' vIpabbogh. 'ej qatlh maw'choH *Hamlet*, Do' 'e' vItu'pu' --- mujchugh, vaj jISammeH po'Ha'choHlaw' ben po'qu'taHbogh yabwIj, ngoDmey vIwamtaHvIS --- DaH 'e' vIHarqu'. tlhaw'DIyuS yIja'choH. De'vetlh lI' vI'Ijqangqu'. polonyuS nISuch Duypu'ma' 'e' yIchaw', jIjatlhpa'. rInDI' 'uQ'a'Daj, naHHey Dajaj De'wIj. tlhaw'DIyuS vaj nay' tIlIHneS SoH. naDev tIDor. [mej *polonyuS*] tlhaw'DIyuS puqlI' QuchHa'ghach meqHey, Hal je Hoch tu'law' ghaH, 'e' muSovmoH, bang ta'be' je. ghertlhuD wa' neH meq potlhmo' qaSpu', 'e' vIHar: Heghmo' vavDaj 'ej moDqu'pu'mo' tlhoghmaj. tlhaw'DIyuS tuQDoq vIlo'rup je. ['elqa' *polonyuS*. lutlhej *voltImaD* *qornelyuS* je] nuqneH, jup QaQ! 'eH, *voltImaD*, nuq Qum *DuraS* loDnI'wI'? voltImaD DurI' je 'ej Duvan, Davanpu'mo'. maja'chuqDI', vaj muvmoH *vortIbraS* tugh 'e' lumevmeH, pa' Duypu' ngeH pIn. *qInSaya* HIvmeH qeqtaH Hu' 'e' Har ghaH. 'ach nuDchu'DI', nIQojmeH qeqtaH chaH 'e' tu'bej pIn. 'ej Qay'qu' --- tojlu'pu'mo', roptaHvIS, qantaHvIS, HoSHa'taHvIS ghaH. vaj mevmeH *vortIbraS*, jabbI'ID lab. nom ghu' vIja': lob latlh. ghaH qunqu' pIn. 'ej not DuQoj 'e' nIDqa', vavloDnI'vaD 'e' 'IpnIS ghaH. vaj Quchqu'mo' pIn qan, *qInSaya* HIvmeH neghvetlh muvmoHta'bogh, DaH ghaHvaD woQDaj nobpu' pIn. 'ej Qu'vaD DISHuchDaj bIHmeH wejSaD DeQmey nob je. tlhobmeH ghItlh'e' lu'angbogh navvam qon je: [ta'vaD nav nob] Qu'vetlhvaD SeplIj lenglaHlI' mangghomDaj tugh 'e' yIchaw'neS. Qob SIQbe'meH 'oH, 'ej chaw'lIj leHmeH, Qu''e' Delbogh navvetlh yIpab je. tlhaw'DIyuS toH, mubelqu'moHbej ghu'vam. vIqelmeH chaw'DI' poHwIj, ghItlh vIlaD. ghu'vam'e' tugh vIbuSchu' 'ej vIjang je. 'a qaSpa', tlhIH Satlho' Suvumchu'ta'mo'. peleS. yupma' wItaghbej, qaSDI' ram. majQa' Sucheghmo'! [mej *voltImaD* *qornelyuS* je] polonyuS Qu' luchavchu'law'ta'. ta', ta'be' je: nuq 'oHnIS ta'Dotlh'e'; nuq 'oH Qu''e'; nuqmo' pem 'oH pem'e'; qatlh ram --- ram'e'; 'ej qatlh poH 'oH poH'e': Hochvetlh vIQIjchugh, vaj pem ram je poH je Hoch vIlo'Ha' neH. toH SovlaHvaD qa'botlh Damo' SoQ vI', 'ej Sov DeSDu', HaQchor je Damo' SoQ Dalqu', vaj DaH nom vIja'. maw'neS puqra'. toH, maw' ghaH, 'e' vIpong neH. maw'lu' net QIjchu'chugh, vaj maw' QIjwI'. 'ach ramjaj SoQvetlh. ghertlhuD law'jaj De'na'lIj, 'ej puSjaj mu'QujlIj. polonyuS qa'Iprup, joH: not mu' vIQuj. toH maw'mo', teHbej SoQwIj. teHmo', Do'Ha' 'oH. 'ej Do'Ha'bej: teH. Dogh mu'Qujvetlh. 'ach 'oH vIghImbej rIntaH, mu' vIQujQo'mo'. maw' ghaH 'e' wIloyjaj. 'ej yabDaj nISchoH nuq DaH 'e' wItu'nIS. toH, "yabDaj mISmoH nuq" DaH jaS vIjatlhnIS: qaSba'taH nISbogh mISvam, lISmo' vay'. vaj ratlhtaH ghu', 'ej ratlhlI' ghu' vIDelbogh. peqImchu'. puqbe' vIghaj. vIghaj vIghatlhtaHvIS. 'ej batlh mulobmo' ghaH 'ej Qu'Daj pabmo', SuH: navvam nobta' ghaH. peqIm; penoH. [laD] HovoywI'vaD --- quvmoHtaHbogh qa'wI' --- *'ovelya* 'IHchu'vaD mujbej mu'vetlh. moHbej mu'vetlh. moHbej "'IHchu'vaD". 'a tugh Hoch bo'Ij. ghItlh: [laD] povqu'bogh roDaj DoqDaq, Dochvam, [taH] ghertlhuD *Hamlet*vo' De'vam Hevpu''a'? polonyuS joH quvqu', loQ yIloS. ghItlh naQ vIlaDchu'. [laD] meQ Hovmey 'e' yIghoH. ratlh pemHov 'e' HIpon. ngeb vIt chIch 'e' yInoH. bang jIH, not 'e' yIHon. *'ovelya*'oy, bom mu' vIghItlhtaHvIS jIpo'be' jay'. 'ItmoHwI'meywIj Hoch QumlaHchu'be' ghItlhlaHwIj. 'ach banglI' jIHbejbogh nong law', bangmey Dabogh latlh'e' nong puS; toH nongbe' latlhvetlh jay' 'e' yIHar. Qapla', jawoy. reH banglI', porghDaj yInmoHtaHvIS neH QuQDaj, *Hamlet*'e'. mulobmo', jIHvaD navvam 'ang puqwI'. 'ej ghaHvaD tlhobDI' *Hamlet*, teSwIjvaD poH, mIw je, Daq je Hoch muja'pu' je. tlhaw'DIyuS 'ach ghaH muSHa'choH *Hamlet*, chay' 'e' laj? polonyuS toH, 'Iv jIH 'e' DaHar? tlhaw'DIyuS loD quv, loD matlh je. polonyuS vItob vIneH. 'a nuq DaQublaH, joH, moD muSHa'ghachchaj tuj, bong 'e' vItu'DI' ('ej 'e' vItu'bej, ja'choHpa' puqbe'wI' --- tlhIHvaD vIchIDnIS), nuq boQubneS, ta', ta'be'lI' quv je, peghghItlhpaq vIDachugh; qoj, tIqwIjvaD mInDu' vISoQmoHchugh, QIchwIj vIlojmoHDI'; qoj, ghu' vIleghDI', nochDu'wIj vIyajbe'chugh; nuq boQubneS? ghobe'. SIbI' jIvang. puqbe'wI' QupvaD vIjatlh: "chavqo'lIj HurDaq *Hamlet* tu'lu'. qaSbe'nIS." 'ej vIra'choH: SuchtaH *Hamlet* 'e' nISmeH wegh'eghnIS. 'oSwI' lajbe'nIS. nobmey Suqbe'nIS. 'ej jIra'DI' rIntaH, yabDajDaq qeSwIj poch. vaj nom vIja': *Hamlet*vaD janglu'Qo'DI', 'ItchoH ghaH. Sopbe'choH. tugh Qongbe'choH. tugh HoSbe'choH. tugh mISchoH. ghaHvaD qaSDI' choHvam Hoch, DaH maw'. DaH wam'egh yabDaj. DaH ma'IQ. tlhaw'DIyuS ghu'vetlhmo' SabchoH ghaH 'e' DaHar'a'? ghertlhuD ghaytan, ghaytan. polonyuS joH, qaSDI' vay' --- vISovqang --- ghu' vI'olmeH, "qaS" vIjatlh'a', qaSbe'bej 'oH net tobpa'? tlhaw'DIyuS wanI'vetlh vISovbe'. polonyuS [nachDaj volchaHDaj je 'ang] teHbe'chugh vuDwIj, Dochvamvo' Dochvam'e' yIteqneS jay'. muchaw'chugh 'eb, vaj nuqDaq So''egh vIt, tugh 'e' vItu' --- yuQbotlhDaq So''eghchugh je. tlhaw'DIyuS toH chay' wItobchoH? polonyuS qaStaHvIS loS rep, naDev rut HeDaq yIttaH. 'e' DaSov. ghertlhuD yItbej. polonyuS vaj pa' puqbe'wI' vIweghHa'. 'ej qaStaHvIS, nuSo'taHjaj HaSta. chay' ghomchuq 'e' yIqIm. ghaH muSHa'be'chugh, 'ej ghaH muSHa'qu'mo' Sabbe'chugh yabDaj, vaj wo' qumboQ jIHbe'jaj. Du', veQDuj je vIvu'choHjaj jay'. tlhaw'DIyuS toH, nab'e' wInID. ['el *Hamlet* laDtaHvIS] ghertlhuD peqIm. DaH chol Do'Ha'wI'. Sagh 'ej laD. polonyuS pemejneS, joH. SIbI' pemejneS, cha'. SIbI' vIDorchoH. Ha' HIchaw'neS, joH. [mej ta', ta'be', toy'wI'pu' je] polonyuS DotlhlIj nuq, joHwI'? Hamlet quv! polonyuS choghov'a', joHwI'? Hamlet qaghovchu'; verengan mut 'oH mutlIj'e' polonyuS ghobe', joHwI'. Hamlet vaj bImutbe'mo' qanaD. polonyuS jImutbe''a', joHwI'? Hamlet HISlaH, mutbe'wI' le' law', wa'netlh tlhIngan le' puS. polonyuS teHqu', joHwI'. Hamlet "pe'vIl targh lomDaq SISDI' 'otlh vID, gharghHom Sepchugh, yInroHHom notlhHa'moHlaHchu'mo' woj'a'..." puqbe' Daghaj'a'? polonyuS HIja', joHwI'. Hamlet bong SISbogh Sep 'el ghaH 'e' yIbot. lopmeH wanI' 'oH ghu muvtay'e', 'ach SeplaHmo' puqbe'lI' --- jup, qeS yIqel. polonyuS [pegh'egh] nuqjatlh jay'? puqbe'wI' buStaH qar'a'? 'a mughovbe'pu'. verengan jIH 'e' noHHa'. loj, lojqu' yabDaj. 'a jIQuptaHvIS je jIH, reH muSHa'qu'bogh tIqwIjmo' jIbechbej --- ghaH vIrurba'pu'. vIjatlhqa'. nuq DalaD, joHwI'? Hamlet mu', mu', mu'. polonyuS De' nuq, joHwI'? Hamlet De''e' ja'pu'bogh 'Iv? polonyuS De''e' DalaDqu'bogh, joHwI'. Hamlet mu'qaD. ghItlh qoH tlhIv, "loD qan porghDaq chIS rol, Hab Quch, DughHa' 'ej Hurgh bIQ jeD nIjbogh mInDu''e', 'ongHa'chu' yab, 'ej pujqu' 'uS." may tIchmeH mu'vam Hoch, 'ach maybe' tIchmeH mIw, mu'qaD veSvam noDlaHbe'mo' qanwI' vay'. boqwIj qan DamuvmeH qaqeS --- bIHeDmeH vetlh nuch DaDachugh. polonyuS [pegh'egh] ghaH mISmoHlu' 'ach Hena' nablaw'ta'. --- Hurvo' bIghoSqang'a', joHwI'? Hamlet molDaq? polonyuS toH, Hurvo' ghoSlu'meH chaq molDaq jaHlu', 'a --- [pegh'egh] pIj jangDI' 'ongqu' SoQDaj. SoQvam 'ong lo'laHbe' nuj pIv, Dupvam tuchmo' mISbe'ghach. vImej 'ej ghomchuq ghaH *'ovelya* je tugh 'e' vInab. --- SoHvo' jIjaHnISneS, joHwI' quvqu'. Hamlet jIHvo' SoHmo' yaHpa' vay', Hoch vIyaHqangmoH jIH, yaHbe'chugh yInwIj neH, yInwIj neH, yInwIj neH. ['el *roSenQatlh* *ghIlDeSten* je] polonyuS SoHvo' jIyaHnIS. Hamlet qoHvam qan qetlh. polonyuS *Hamlet* quv bonejlaw'. pa' ghaHtaH. roSenQatlh [*polonyuS*vaD] Dutlho'jaj qeylIS, qaH. [mej *polonyuS*] ghIl: joHwI' quv! roSenQatlh joHwI' webHa'! Hamlet juppu'wI' QaQqu'! Dotlhraj nuq, *ghIlDeSten* *roSenQatlh* je? nuqneH? roSenQatlh wa'Hu' may' yoS wutlhDaq 'Iwghargh Dotlh yon'e'. ghIl: Do' yapmo' neH Dotlhmaj Do', maQuch. mIvDaq tuQbogh San maQambe'. Hamlet DaSmeyDaj bIngDaq SuQambe' qar'a' je? ghIl: HISlaH. Hamlet vaj qoghDaq tuQbogh, botlhDaj yonDaq joq SuQam. ghIl: loQ. jojDajDaq neH maQam. Hamlet San 'ay' Qut tlhIHbej'a'? wejpuH, teHqu'! ngaghHa'wI' ghaH. De' chu' HIja'. roSenQatlh chu'law' ghu'vam neH --- maychoH 'u'. Hamlet vaj tugh qaS maQmIgh'a'! 'ach teHbe' De'raj. Sayu'qa'chu'. HeSraj nuq bIjmeH San, naDev bIghHa'Daq lIngeH. ghIl: bIghHa'Daq? Hamlet bIghHa' 'oH Qo'noS'e'. roSenQatlh vaj, 'oH je 'u''e'. Hamlet bIghHa' tIn'e'; 'oHDaq weghbogh pa'mey, Surchemmey je, qama'DISmey je lutu'lu'; Qo'noS qab law', Hoch qab puS. roSenQatlh 'e' wIQoch. Hamlet vaj 'oH boqelDI' bIghHa' botu'be'. QaQbe' 'ej qabbe' ghu', 'a QaQ pagh qab 'e' tu' qelwI' neH. vIqelDI' bIghHa' vItu'. roSenQatlh toH bIchavqu' 'e' Danabmo' vaj bIghHa' Datu'. chavnablIj wegh qo'lIj. Hamlet QI'yaH mungaSchu'chugh naH HanDoghHomHey, mIch'a'mey'e' not luvuSlu'bogh vIche' 'e' vItu'laH. 'ach vItu'be' muSujmo' wanI' vInajbogh. ghIl: tugh bIchavqu' 'e' Danajbej. nab chavlu'bogh 'oS wanI' QIb najlu'bogh. Hamlet QIb bIH Dochmey Hoch'e' najlu'bogh. roSenQatlh teH. 'ej QIb QIb Sub law', chavnab Sub puS 'e' vIHar. Hamlet vaj porgh 'oH qoHma''e' 'ej chuQunma', chavbogh SuvwI'ma' je chaH neH qoH QIb'e'. bo'DIjDaq wIghoHnIStaH'a', Hu'tegh jImeqlaHbe'mo'. cha': pItlhej. Hamlet baQa' Qo'! tlhejwI'wI' tIDaQo', toy'Ha'mo' mutlhejtaHvIS chaH. 'ach jupwI' tlhIH pIj ben 'e' botobmo' DaH peyuDHa'. qatlh *tlhIn*Daq tlhIH? roSenQatlh pISuchmeH. wanI' latlh wIneHbe'. Hamlet mIpHa'wI' vIDamo', jItlho'DI' jIchuSbe', 'ach Satlho'. 'ej, jupoy, va yapqu'bej jIDIlmeH mu'DeQwIj. naDev SupawmeH bora'lu''a'? bowuqqu''a'? boneHbej'a'? Ha' Ha' HIpab. Ha' Ha'. Qo' pejatlh. ghIl: nuq wIjatlh DaneH? Hamlet jISaHbe', 'a yIjangchu'. SupawmeH lIra'qu'ta' vay' 'e' luDISlaw' qabraj DIv'e' jechlaHbe'bogh jup boDameH mIw. lIra'ta' ta' ta'be' je QaQ 'e' vISov. roSenQatlh qatlh, qaH? Hamlet tuja'nIS. 'a taHmeH boqmaj yuDHa' tuvItjaj. boqmaj matlhmo', parHa'ghachmaj Qupmo', jupbatlhmaj yuDHa'mo', potlh Hochmo' je DellaHbogh gharwI'na' jIHbe'bogh batlh Sayu'DI', Satlhob: tujangmeH peyuDHa' 'ej HIvIt, SupawmeH bora'lu'ta' qar'a' jay'? roSenQatlh [*ghIlDeSten*vaD pegh] nuq DanoH? Hamlet [pegh'egh] vaj Qo', SaSuvrup. tuparHa'chugh vaj yImImQo'. roSenQatlh joHwI', mapawmeH wIra'lu'ta'. Hamlet Sulay'ta' 'e' boquvmoHmeH 'ej notlhchoHbe'meH 'Ipraj, qatlh lIra' 'e' vIloychu' jIH. qaStaHvIS Hu'meyvam 'ItwI' vIDa; jIHaghlaw'Qo'; jIreHlaw'Qo'. 'ej 'u' qo''a'vam je qelDI' maw'wI'vam vImojlaw'pu'bogh, DaltaHbogh ghe''orHey'e' tu'. Dung'a'maj pov'e', SuS'e', nuDechtaHbogh moQ'a' 'IH'e' yItu'. toH chalvetlh jenDaq HuS meQbogh Hovmey wov --- wejpuH, jIHvaD He'So'bogh SIptlhoQ ngIm rur. toH, chovnatlh Doj ghaH tlhIngan'e'. valqu' meqlaHDaj. HoSqu' porghlaHDaj. vIHtaHvIS SomrawDaj po' 'ej le'qu' ghaH. Dol'a' jub rurqu' SuvtaHvIS. QI'tu' moch rurqu' QubtaHvIS. 'IHchu'bogh qo''a'Daq pupchu' mutvam 'IH. 'a jIHvaD ramlaw' --- chenmeH porghmeyvam lam'e' tlholHa'moHqu' 'u'. mubelmoHbe' loD --- be''e' je, 'ach SuHaghmo' jaS SuHarlaw'. roSenQatlh joHwI', yabwIjDaq 'oHpu'be' qech vay' tlhaQ. Hamlet qatlh bIHagh, vIjatlhDI' "mubelmoHbe' loD..." roSenQatlh nIbelmoHbe'chugh loD, vaj DawI'pu''e' DabejDI', Human tejpu'Hey DaqIH 'e' DaDanISlaw'. chaH DIjuS naDev maqughtaHvIS. toH, naDev nItoy'meH chol chaH. Hamlet batlh paw ta' DawI'. ghaH vIvanchu' jIH. SuvmeH vaj yoH, 'etlh yoD je lo'jaj. jachDI' muSHa'wI', lI'chu'jaj HughDaj. SoQ naQ rInmoHchu'jaj nongwI'. taghDu''e' reH luchu'beHlu'bogh jormoHbejjaj HaghmoHwI'. jatlhtaHvIS pabjaj be''a', pagh ghaH pab bom mu'tlheghDaj. DawI'ghomvam nuq? roSenQatlh vengvo' lot ja'wI''e', reH DatIvqangbogh ben DabejtaHvIS. Hamlet nuqmo' DaH lengtaH? vengDaq juHDaq ratlhchugh vaj taHchu' batlhchaj malja'chaj je. roSenQatlh malja'chaj lunISlaw' noywI'pu' chu'. Hamlet DaH naD Hevbogh 'ugh'a' law', ben vengDaq jIHtaHvIS naDchaj 'ugh'a' puS? lunaDlu'taH'a'? roSenQatlh ghobe'. Hamlet qatlh DuH ghu'vam? ragh'a'? roSenQatlh ghobe', chaHvaD laH po' polmoH qeqchaj. 'ach nIS puqtlhoQ chu''e', Qa'Hompu''e'. DataHvIS SoQchaj chuS lachmo', chaH naDqu' je bejwI' Seyqu'. DaH noychoHpu' 'ej "Qopbogh DawI'yaHmey"qoq tIchqu'mo', ghItlhtaj vaQ law', 'etlh vaQ puS 'ej 'elvIp 'etlh qengwI'. Hamlet toH puq chaH'a'? Qorgh 'Iv? je' 'Iv? bomlaHbe'DI' ghoghchaj notlhchoH'a' Qu'chaj? nem beprup'a', DawI' qan chaHDI' (ghaytan qaS wanI'vam, jaS malja' ghajlaHbe'chugh je), chaH nuS'eghmoH ghItlhwI'chaj, DawI' ngo' cho'nISbogh naDHa'qu'mo'. roSenQatlh QI'yaH pIj Qay'qu' cha' jaghHeyvam. SoltaH DawI'pu' 'e' lutungHa'mo' rewbe', Qu'chaj lunaDtaH. benvam, lut ghItlh'e' reH DIlQo' muchwI' Hoch, lutDaq DawI' veSmo' tonSaw' luqaSmoHbe'chugh je ghItlhwI' DawI' je. Hamlet qarqu''a'? ghIl: va yabtonSaw' luqaSmoHqu'bejtaH cha'. Hamlet Qap'a' QupwI'? roSenQatlh toH HIja' jay' --- qo'qengwI' tepDaj je DawI'ghom lunge' je. Hamlet net pIHbej. ta' ghaH vavloDnI'wI''e', 'ej DaH DeghDaj DIlmeH cha'maH, loSmaH, vaghmaH, wa'vatlh ghap DeQ nobqang ben ghaH luvanHa'qu'bogh ghotpu''e', yIntaHvIS vavwI'. Qu'vatlh, ghu'vam motlh law', 'u'pab motlh puS; ghu' QIjjaj QeD. [chuS DawI'pu' maqmeH QoQ] ghIl: paw DawI'pu'. Hamlet batlh *tlhIn*Daq Supawpu'. DeS tIlo', pevan. naDev potlh 'ej quv ma'lu'meH mIw'e' ra'bogh lurDech. 'a naDev chaH DIma'meH (jaqqu'nISbogh) mIw jaq law', tlhIH rema'meH mIw jaq puS 'e' botu'chugh vaj DaH Supawta'mo' jIQuch 'e' yISov. naDev batlh tlhIHtaH. 'ach vavqoqwI' SoSHeywI' je toj ghu'. ghIl: ghu' nuq, joHwI'? Hamlet pagh pagh pagh DoD cha' QuvDaq jImaw'. choHDI' lurghvetlh pIm Qogh 'er je 'e' vIghovlaH. ['el *polonyuS*] polonyuS Saghom, loDpu'. Hamlet HI'Ij, *ghIlDeSten* --- SoH je --- cha' qoghDaq cha' QoywI''e'. ghuSutHom tuQtaH wej 'e' mev loDqoqvetlh. roSenQatlh cha'logh puq mojlaw'pu'. toH puq chaHqa' loDpu''e' qanDI' chaH, net joS. Hamlet paw DawI', muja' 'e' nabba'. yItu' --- toH bIlugh. Hoghjaj wa' qaS. lughqu' mu'. polonyuS De' qaja', joHwI'. Hamlet qoj SoHvaD De' vIja' jIH. remuS luDanchoHDI' romuluSngan... polonyuS paw DawI'pu', joHwI'. Hamlet not mev peghmeyHey! polonyuS baQa' qavIt. Hamlet 'ej targhDaj lIgh DawI'pu' Hoch. polonyuS laHchaj Doj law', laH Hoch Doj puS, lotlut, HaghmoHbogh lut joq, qunlut, noybogh lut tlhaQ, HaghmoHbogh lut noy, qunlut noy, qunlotlut, HaghmoHbogh qunlotlut noy joq ja'meH DataHvIS. "morab qeylIS je" ja'meH 'IQqu'be' qoj "verengan'a' Qagh" ja'meH Quchqu'be'. DataHvIS lurDech lobmeH pagh tlhabmeH laH Dojqu' 'oH DawI'pu'vam laH'e'. Hamlet bo'DIj pIn'a', toH *ghaw'ron* qan! tev'a' Daghajbejpu'! polonyuS tev'a' nuq ghaj ghaH? Hamlet toH, 'ej ghaHvaD wa' puqbe' neH tu'lu'. puqvetlh muSHa'taH ghaH 'ej Qan. polonyuS [pegh'egh] puqbe'wI' buStaH. Hamlet lugh qar'a' mu'wIj, *ghaw'ron*Hom? polonyuS chopongmeH *ghaw'ron* Dajatlhchugh, vaj wa' puqbe' vImuSHa'taHbogh 'ej vIQanbogh vIghajbej. Hamlet ghobe', qarbe'. polonyuS vaj qar nuq? Hamlet toH, ra'taHvIS San, Dach Sun. 'ej qaS wanI''e' DaSovbogh: vaj ghaHvaD qaSpu' qun wanI'. SoHvaD ghu' naQ Del bomvam mu'tlheghmey wa'DIch'e'. toH nughoS mevmoHwI'wI'. ['el DawI' puS] Hamlet batlh naDev tlhIHtaH, pInpu', batlh Savan. naDev tlhIHmo' jIlop. batlh chetlhejjaj. --- jupwI' nI''e', ben qaleghbogh, DaH jIbvam chu' Suqba'ta' qab. qab laHlIj 'e' chotemmeH naDev Qo'noSDaq SoH'a'. --- toH, be'oywI' quv. chalDaq nachlIj SalmoHtaHvIS tIqchoHba'taHbogh pIplIj, 'ughqu' QuchlIj ghegh 'e' luSIQ waq. ghay'cha' bombogh HoS lIngwI' rurmo' ghoghlIj Qup, va 'oH Sorghbe'lu'pu'jaj jay'. --- pInpu', batlh chetlhej. SuDachoHmeH romuluSngan wamwI' boH tIDa; Hoch luleghbogh luHIv. SIbI' SoQ wIQoyjaj. Ha' laHlIj po' yItob. Ha' SoQ nong. D1: SoQ nuq, joHwI' QaQ? Hamlet wa'logh SoQ chojatlh, 'ach not lut naQ Daqu' vay'. pagh, 'oH ja'meH Daqu'chugh vay', vaj wa'logh neH Da, rewbe' belmoHbe'law'mo', 'e' vIqaw. to'baj 'uSDu'vam Sopqangbe' chaH, qaSbe'taHvIS QI'lop. 'a vIqelDI' jIH --- vuD quvqu' ghajbogh latlh'e' je --- lut pov wItu'. 'ay'meyDaj buvchu' pabbogh 'ej po'qu'bogh ghItlhwI'. wIbHa'meH HaQchor chelbe' ghaH net ja'law', 'ej mu' ngeb lo' ghaH 'e' pumlaH pagh; 'ach yuDHa'law' mu'mey net maq. pup 'ej nong. mIybe'law'taHvIS Doj. lutDaq wa' SoQ'e' vIparHa'qu'pu': *DI'Do'*vaD SoQ'e' jatlhbogh *'enyaS*. Hegh *pIray'am* 'e' buSbogh SoQ'e' vIparHa'qu'. qawbogh yablIjDaq yIntaHchugh vaj mu'tlheghvamDaq yItagh: toH jIQub, jIQub --- rughtlhoQ rurlaw' pob qIj *pay'ruS* --- qarbe'. SoQ tagh *pay'ruS* mu'tlhegh. ramjep rurlaw' pob qIj *pay'ruS* DeSDu' Dugh, HoH 'e' Hechmo', Sanchaj SomDaq QojrupmeH QottaHvIS. pe'vIl porghDaj qIjqu'Daq qu'Daq DuQwI' DeghHey'e' DaH ngoHpu' ngotlhwI'. qabDaq qamDu'Daq je Doqchu' DevwI'. ghaHDaq ghomHa'pu' qorDu' quppu' je 'Iw'e' 'uybogh 'ej QIt QaDmoHbogh qechmey qul'a'. vaj che'wI Post został pochwalony 0 razy